U cullettivu Parlemu Corsu hè natu in 2007. Adunisce oghje parechji associ, sindicati, urganìsimi da tutte e mamme per circà di dinamizà a sucietà corsa à prò di a so lingua, da pudè cuntribuisce à « l’ilaburazioni prugrissiva d’una sucità bislingua corsu è francese ». U so presidente, Micheli Leccia, ùn risparmia micca u so tempu è scumbatte nant’à tutti i terreni da valurizà, sparghje, è fà cresce l’usu di a lingua corsa.
Frà l’azzioni messe in ballu, ci hè Rubutiscola. I so primi risultati èranu prisentati u 6 di ghjugnu scorsu à u cullegiu di u Fium’Orbu. Rubutiscola benefizieghja d’una cunvenzione cù u Retturatu è apre a nostra lingua à a mudernità, nant’à un dumìniu puru tècnicu chì mostra chì si pò dì è fà tuttu in lingua corsa ! Felicitazioni à Parlemu Corsu è tutti quelli chì s’impègnanu à fà campà a nostra lingua à u cutidianu è nant’à tutti i terreni !
Cosa hè Rubutiscola ?
Micheli Leccia : Si tratta d’un attellu di rubòtica in lingua corsa. I sculari chì participèghjani à l’attellu, ricèvini struzzioni in corsu è so cundutti à custruì unu robò è à falli rializà missioni, par vìa d’una prugrammazioni infurmàtica. Hè unu insignamentu in immirsioni, durenti à l’annata sculara è drentu à i stabilimenta.
U prufissori ùn si sprimi chè in corsu. U scularu parla ciò ch’eddu voli è ciò ch’eddu pò, ma hè sicura chì u bagnu linguìsticu ricivutu u cunduci pianu pianu à fà prugressa in lingua corsa. Ci hè da scumetta dinò chì i ziteddi trà d’eddi s’ani da mutivà par accrescia l’uni è l’altri i so cumpitenzi in lingua corsa, postu chì ’ssa lingua duventa u linguaghju di un sughjettu chì i passiuneghja.
Chì hè u scopu ?
L’ugittivu hè doppiu : trasmetta a lingua corsa è trasmetta una disciplina d’avvena, a rubòtica. S’impara a rubòtica à traversu a lingua corsa. Al di là di a trasmissioni stessa di a lingua circhemu à valurizalla assucèndula à una disciplina chjamata à sviluppassi è fundamintali pà i sucità di dumani. Vulemu fà rimà lingua corsa cù mudarnità !
U scularu intarissatu da a rubòtica, ùn avarà altra scelta chè di riceva unu insignamentu à traversu a lingua corsa è tandu a lingua corsa acquista sùpitu unu statutu di lingua alta, veni à dì una lingua chì duventa indispinsèvuli è in più liata à l’innuvazioni. Otantu unu scularu chì si sarìa disintarissatu di u insignamentu corsu, ci pò vultà par vìa di a so attraenza pà a rubòtica… Hè par quissa ch’emu sceltu d’adrizzassi à i culligianti. Sò biscalzoni à quali suventi ùn li piaci tantu u quatru scularu abituali. Or, si sà chì i robò sò particularmenti attrattivi pà i ziteddi. Tandu, prupona l’usu di’ssi ticnulugìi, for’di u tempu scularu nurmali è drentu à attella spicìfichi, ni pò mutivà unipochi à invistìsciasi in ’ssa furmazioni.
Cumu hè statu messu in ballu u prugettu ?
Ciò chì ci hà datu l’idea di fa ’ssu prugettu hè u mudellu di i scacca, chì hà sappiutu travaddà cù u mezu scularu è sviluppassi par tuccà unu nùmaru impurtanti di ziteddi dopu à parechji anni d’animazioni. D’altrondi, ancu s’eddu ùn hè micca u so prima ugittivu, adòprani ancu a lingua corsa in certi uccasioni, omancu à u scrittu o à traversu videò pidagògichi o prumuziunali.
Tandu, cù u cullittivu Parlemu Corsu ! ci semu fatti a dumanda « Chì attellu crià par attirà i ghjòvani è prufittà di l’uccasioni par trasmèttali a lingua corsa ? » Hè cussì ch’emu pensu à a rubòtica parchì hè una disciplina chjamata à sviluppassi è ancu à fà parti d’u nosciu cutidianu è di règula i novi ticnulugìi è più particularmenti i robò, piàcini à i ziteddi.
À parta da u 2019, à u nomu di u Cullittivu, emu cercu à travaddà cù infurmàtichi – com’è l’univarsitaria Marielle Delhom, è u furmatori è imprisariu Jean-Noël Vignaroli – par custituì un cartulari è pudè prisintà u prugettu. Cun eddi emu riflittutu à un cuntinutu pidagògicu imaginendu una prugrissioni da sculari principianti, à sculari di niveddu mizanu po à sculari di niveddu cunfirmatu, passendu d’un tempu di scuparta à un tempu più criativu. Hè cussì ch’eddu hè privistu d’apudrà diffarenti linguaghja infurmàtichi di più in più sufisticati.
Nu u 2021 era prontu u cartulari è emu cercu in un prima tempu d’impignà a CdC è u Ritturatu. Appughjèndusi à nantu à i nosci cunniscenzi èrami pronti à mubilizà a mità di i cullegia di Còrsica, veni à dì 16 à nantu à 32. Ma a crisa sanitaria di u Covid è i lizzioni tarrituriali dinò, ci ani cunduttu à attimpà a cuncritizazioni di u prugettu. Mantinendu u cuntattu cù parechji insignanti è capistabilimenta, emu aspittatu di vultà à una situazioni più favurèvuli par riinizià u prugettu. Tandu, ghjè u 21 di dicembri 2023 ch’è no signàiami una cunvanzioni cù u Ritturatu par pudè principià u prugettu è pruvallu à tìtulu spirimintali in u stabilimentu di u Fiumorbu, indu’pudìami cuntà à nantu à a prisenza di Jean-Christophe Olmiccia, prufissori di matimàtichi è membru di u cullittivu Parlemu Corsu !
Cumu viaghja l’attellu è cumu s’urganizeghja l’insignamentu immersivu nant’à un duminiu quantunque abbastanza tècnicu ?
Ci spartimi u rolu. U cullittivu Parlemu Corsu !, iniziatori di u prugettu, aghjunghji u cuncettu (attella di rubòtica in immirsioni di lingua corsa), u matiriali di rubòtica compru cù i solda di u cullittivu, u furmatori par appruntà u insignanti à manighjà u matiriali nanzi à u principiu di l’attellu, u insignanti binèvuli (par quistu annu) par pirmetta a rializazioni di u prugettu, u sèguitu di l’attellu è u censu di i bisogna linguìstichi inghjinnati da a pràtica.
U stabilimentu chì accoddi l’attellu di rubòtica aghjunghji l’accunciamentu di u spartitempu di u insignanti vulintariu par pirmèttalu d’animà l’attellu, a sala par pudè accodda l’attellu, a sala par faciltà a intarvinzioni di u furmatori, l’armoria par accantà i scàtuli di robò, a prumuzioni di l’attellu à l’internu.
Da nutà ch’un lèssicu di paroli spicìfichi è d’usu fraquenti l’emu dighjà prupostu (in u rispettu di a pulinumìa) par facilità a dicitura di u prufissori di pettu à i sculari. Po pian pianinu, cuntemu di custituì unu racoltu di paroli da publicà in cullaburazioni cù a Canopé. Sarà un travaddu arricchitu da u ritornu di u tarrenu è chì si voli cumplimintariu à ciò chì asisti dighjà com’è i lèssichi di matimàtichi, Educorsica o di l’Adecec è com’è i traduzzioni rializati da insignanti di matimàtichi, di u linguaghju infurmàticu Scratch.
U Ritturatu eddu s’ingagia à cuurdinà u partinariatu cù i stabilimenta di l’accademia è u cullittivu Parlemu Corsu ! D’altrondi hè u impegnu di u Ritturatu chì hà pirmissu a cuncritizazioni di’ssa prima annata di spirimintazioni.
Site cuntenti di i primi risultati ? Chì sò e perspettive d’avvene per ssu prugettu ?
Ssa prima spirienza s’hè musciata pusitiva (missioni rubòtica rializata, sculari pronti à ricumincià, insignanti sempri mutivatu, d’altri stabilimenta intarissati…). Riflettimu à a manera di parsiguità u prugettu. Sarà l’ugettu di i sittimani à vena…
Cù u tempu, ben intesu, l’idea hè di fà crescia u nùmaru di i participanti, sculari è insignanti. Pà a qualità di u insignamentu, custrettu d’essa rializatu in una ora, era statu dicisu di limità un attellu in inghji stabilimentu, à 10 sculari chì si poni assucià par dui. Intantu, cù d’altri insignanti, ancu d’altri sculari pudarìani custituì un antru attellu in u listessu stabilimentu.
È puri, cuntintèndusi di 10 sculari par stabilimentu, hè quantunqua cunsidarèvuli u nùmaru di i ziteddi chì pudarìani essa cuncirnati, sì à longu andà, u prugettu hè allargatu à tutti i cullegia (32), po i scoli primarii (254) è i licea (15). Ciò chì pò riprisintà 3010 sculari…
In fini, si pò imaginà dinò, dopu à avè acquistatu cumpitenzi, di dumandà à i sculari di spona i so rializazioni (à l’uccasioni di cullocchia) o di falli participà à cumpitinzioni (in Còrsica o for’ di Còrsica). Parchì micca tandu, impignà i media lucali par offra una ristrasmissioni di u cunfrontu di i sculari ? Parchì micca ricumpinsà i sculari da un viaghju par veda una fàbrica di robò umanòidi o par assista à un salonu cunsacratu à l’innuvazioni ticnulògica ?
Ùn màncani i pirspittivi di sviluppu è sempri vighjaremu à l’unniprisenza di a lingua corsa, ancu aduprendu traduttori casu mai. A lingua, edda, ni sarà chè di più missa in valori è for’ di Còrsica risplindarà…
Fà entre a nostra lingua in duminii induve ùn s’aspetta micca, serà per mustrà chì a nostra lingua hè muderna anch’ella ? Cosa li pò purtà à a Rubòtica è viciversa ?
Unu insignamentu di rubòtica porta u scularu à sviluppà u so sensu lògicu è à piddà l’abitùdina, di pettu à un prublema, di spona argumenta par ghjustificà i suluzioni ch’eddu pruponi. Acquista cussì una ginnàstica intilittuali chì li pò ghjuvà in tutti i disciplini è ben intesu par ciò chì tocca à a imparera di a lingua. U cuntrariu hè vera dinò : un ciarbeddu avvezzu à manighjà dui o parechji lingui duventa ghjunchèvuli è favuirisci a criazioni di cunnizzioni novi, ùtuli par fà diduzzioni lògichi !
Rubutiscola duventa tandu u prugettu di dui disciplini cumplimintarii ch’è no pudemu riassuma in una frasa : a rubòtica à prò di a lingua corsa è a lingua corsa à prò di a rubòtica !
Cumu si porta u cullettivu Parlemu Corsu ?
Simu ricchi d’una spirienza di 17 anni, vulemu francà una tappa è andà al di là d’azzioni chì mòsciani l’asempiu, al di là d’azzioni chì scètani i cuscenzi. Oramai, vulemu fà azzioni più pirenni ch’ani da pirmetta una irrigazioni di a sucità di modu cuntìnuu…
Tandu, si tratta par no di metta in òpara prugetta à u sirviziu d’un pianu sucitali.
Sò 10 i prugetta ch’è no avemu cuncipitu. Tòccani u mezu iducativu, u mezu artigianali, i ziteddi, i maiori, a tradizioni (i fieri) è a mudarnità (internet)…
Sei sò dighjà in andà ; l’altri abbisògnani di più tempu è di più meza par essa cuncritizati. Frà altru, cuntemu à nantu à a rializazioni di a quattrèsima idizioni di A Currilingua par prugrissà in u sensu.
Tutti ’ssi prugetta sò cundutti à crescia è à tuccà millai di parsoni cù una visibilità maiori… Hè sicura chì ’ssa nova andatura ùn firmarà micca senza cunsiquenzi à nantu à a sucità. Participeghja à una dinàmica intratinuta da a corsa sulidaria, A Currilingua chì faci participà dighjà tutti i sittori di a sucità. Ssa corsa chjamata à crescia ancu edda, offri pirspittivi giganti par accodda solda ma subbra à tuttu par fidirà tuttu un pòpulu in Còrsica è for’ di Còrsica !
I perspettivi sò più chè felici dunque ?
Ùn ci piattemu a rialità : a noscia lingua hè in gattiva saluta. Ma agì si pò sempri. À cantu à Parlemu Corsu ! l’iniziativi individuali o assuciativi ùn màncani micca d’altrondi. Ci voli à riescia oramai à avè un accostu più glubali.
Di sicuru, unu statutu di cuufficialità ferma nicissariu par valurizà a lingua è par uttena meza cunsidarèvuli à u sirviziu d’una pulìtica ambiziosa, binifiziendu d’un appoghju ghjurìdicu.
Intantu, ci tocca à intarvena circhendu d’uttimizà i nosci azzioni par cunturrà u prublema di mancanza d’unu statutu sòlidu è par appruntà u tarrenu pà u ghjornu ch’è no strapparemu ssu statutu.
Tandu, spicèmuci di metta in òpara i prugetta ch’è no prupunimu, chì d’altrondi, ni semu cunvinti, ni chjamarani d’altri ! •
