Militente di a lingua, Carlu Castellani hè statu durante anni è anni una di e piume d’Arritti. Fundatore di Scola Corsa di Bastia 1 in tempu di u Riacquistu, hà scrittu parechji libri, frà i quali sta Mémoire des jours – Fatti è Detti. Usi, tradizioni, fatti, detti… Arritti ramenta quì qualchi sprichju di st’òpera volta annant’à a nostra cultura è a nostra stòria, ghjuvelli cù a lingua di l’ànima di u pòpulu corsu.
È tante salute à Carlu Castellani !
U primu di ghjennaghju. Ci conta Carlu Castellani chì i cinnini fecìanu u giru di u paese per augurà a bon’annata : Pace è salute à tutti. Bon dì è bon annu, bon principiu è megliore fine !
Tandu, s’omu ùn li offrìa micca un pìcculu rigalu, l’auguru scambiava : Ne bon dì ne bon annu, centu chjodi in u calcagnu, unu in a coscia è vi pòrtinu à a fossa…
U 3 di ghjennaghju. Carlu Castellani ramenta ch’ellu hè u 3 di ghjennaghju di u 1765 chì Pasquale Paoli face apre una scola in parechji paesi di Corsica, è fonda in Corti l’Università induve s’impara frà altru a filusufìa, a rettorica, a fìsica. I primi prufessori sò a maiò parte franciscani. Ci si trova Guelfucci di Belgudè (secretariu di Paoli), Mariani di Curbara, Ferdinandi di Brandu… Paoli vole cusì furmà i quadri necessarii à a nazione in tutti i duminii : ghjesgia, ghjustizia, medicina, armata. L’Università era trattenuta cù i doni di u cleru, è era gràtisi pè i studianti. Ogni annu Paoli era presente à l’esami ch’èranu pùblichi.
L’Università fù chjosa dopu à a disfatta di Ponte Novu.
Hè un 3 di ghjennaghju di u 1899 ch’ellu s’hè spentu dinù Munsignore Paulu Matteu de la Foata. Natu in Alzilone u 4 d’aostu 1817, hè statu Vescu di Corsica in u 1877 è a so òpera literaria hè tamanta, dice Carlu Castellani.
U 6 di ghjennaghju. Pasqua Pifania. Chì di Pasqua Pifania lasagne ùn manghja tuttu l’annu si lagna. Dice Carlu Castellani chì stu ghjornu e ghjuvanotte brusgìavanu e rame d’alivu diciendu : Pasquarella dimmi s’ella hè vera o s’ella hè bucìa. È fecìanu dopu un auguru. •
- In u stessu tempu, Ghjuvan’Battista Stromboni avìa creatu Scola Corsa di Corti. Addurmintatu dopu cù l’anni, u nome di l’associu hè statu ripigliatu in u 2021 per creà e scole corse assuciative d’insignamentu immersivu di a Federazione Scola Corsa. ↩︎
