Militente di a lingua, Carlu Castellani hè statu durante anni è anni una di e piume d’Arritti. Fundatore di Scola Corsa di Bastia in tempu di u Riacquistu, hà scrittu parechji libri, frà i quali sta Mémoire des Jours – Fatti è Detti. Usi, tradizioni, fatti, detti… Arritti ramenta quì qualchi sprichju di st’òpera volta annant’à a nostra cultura è a nostra stòria, ghjuvelli cù a lingua di l’ànima di u pòpulu corsu.
19 di marzu. San Ghjisè, patrone di Bastia dapoi u 1632.
A ghesgia fù custruita trà 1626 è 1635. Sò i bancalari chì purtàvanu u Santu, ch’hè u so prutettore.
Precàntule : « Chè San Ghjiseppu à l’angunia ci assisti cun Gesù è Maria ». « Chì santu sia ora pro no bis »
Spressione : « San Ghjisè dumane ghjè a to festa ». Vale à dì, spieca Carlu Castellani, ch’omu pò sempre corre.
Attenzione : « Ghjoca cù i fanti è ùn scherza cù i santi » perch’è « cun l’aiutu di i santi si entre in Paradisu ». È, dice torna Carlu Castellani, ùn vi tichjate di panzarotti, fritelle fatte cù a farina ci ceci, o di risu.
Infine sta legenda : Perseguitati da Hérode, Ghiseppu, Maria è u Gesù bambinu si piattonu daretu una scopa chì hà traditu a so presenza muvendu e so foglie. Dapoi, si dice : « bugiardu cum’è a scopa ».
19 di marzu di u 1943, arrestazione in Aiacciu di u resistante Fred Scamaroni chì si tomba dopu in a so cèllula. U stessu ghjornu, à u largu di Bastia, u bastimente Francesco Crispi hè turpigliatu da un sottumarinu inglese. Ci si mòrenu 600 suldati taliani.
21 di marzu 1974, u gruppu clandestinu Ghjustizia Paolina segna a so nàscita fendu saltà una caravelle in Poretta. Si scioglie dui anni dopu.
22 è 23 di marzu 1943. Manifestazioni in Bastia per via di a ghjente chì pate a fame. Raziunamentu, sfilarate davanti i magazini, marcatu neru… schiatta una rivolta u 23 di marzu per dumandà una crèscita di e razioni alimentàrie, i manifestanti, raghjunti da i liceani, si ritròvanu piazza Pétain (anzianu nome di a piazza San Niculà). Schiàttanu azzuffi cù e forze di l’òrdine di u guvernu Vichy.
24 di marzu 1964 : creazione di 21 regioni ecunòmiche cù un prefettu à capu. A Corsica hè leata à Provence-Côte d’Azur. Ùn hè chè u 10 di ghjennaghju 1970 ch’ella diventerà a 22a regione in Francia.
27 di marzu : San Parteu. Sarebbe u primu Vescu di Mariana.
A ghjesgia di a Canònica li hè dedicata. Da ch’ellu piovi, dice Carlu Castellani, si preca San Parteu chì sarebbe natu in Casinca : « San Parteu zampa di boi zampa di vacca màndaci l’acqua ».
A legenda dice chì San Parteu averebbe attippatu un monte da induve averebbe benedettu a Balagna. Dapoi, u monte chì face 1680 metri, porta u nome di San Parteu. •
