Militente di a lingua, Carlu Castellani hè statu durante anni è anni una di e piume d’Arritti. Fundatore di Scola Corsa di Bastia in tempu di u Riacquistu, hà scrittu parechji libri, frà i quali sta Mémoire des Jours – Fatti è Detti. Usi, tradizioni, fatti, detti… Arritti ramenta quì qualchi sprichju di st’òpera volta annant’à a nostra cultura è a nostra stòria, ghjuvelli cù a lingua di l’ànima di u pòpulu corsu.
3 d’aprile di u 1838, more in Santiago di Cubà u duttore Francescu Antomarchi. Natu in Morsiglia in u 1780, avia raghjuntu à Napuleone in Sant’Elena à a dumanda di u Cardinale Fesch.
Sempre un 3 d’aprile ma di u 1848, Le Républicain scrive : « sciaccamanemu i sforzi (di l’Italia) è i so trionfi, noi abitanti d’un ìsula taliana per via di a so pusizione, a so lingua, a so religione, a so murale, brameriamu à esse Rumani sè ùn èramu Francese… »
4 d’aprile di u 1904, u bastiacciu Vincent Piereschi presenta à a mostra internaziunale di Tulò, un diragliadore per bicicletta pisendu 400 grammi è avendu sei vitezze. Vince a medaglia d’oru. À l’èpica, i diragliadori pisàvanu trà dui à quattru chilò.
4 d’aprile di u 1977 u muvimentu FRANCIA minaccia in un cumunicatu : « Autonomìsimu è indipendenza, quì in Corsica, ùn sò chè una sola è listessa cosa… i membri di u FLNC sò autunumisti cù nome d’urìgine sarda o Corsi mischiati. Ssi cusì detti naziunalisti sò bastardi… »
Spieca Carlu Castellani ch’ind’è l’annata 1975, nàscenu parechji muvimenti clandestini anti autonomisti frà i quali Ghjustizia Morandina, Groupe Corse – France, Ghjustizia è Libertà… Tutti sti gruppi si sciòglienu in principiu di u 1977 in un solu muvimentu : FRANCIA (Fronte d’Azzione Nova Contr’à l’Indipendenza è l’Autonomia).
Scrive u vice amirale Antone Sanguinetti in Procès des Jacobins (edizione Grasset, 1979) : « Si dice chì i dirigenti di FRANCIA sarèbbenu funziunarii in esèrcitu, prutetti da u Statu, hè certa chì nisun frà elli ùn hè mai statu inchietatu, nemancu interrugatu. Hè per quessa chì i Corsi i chjàmanu Barbusi ».
6 d’aprile di u 1725, nasce Pasquale Paoli in Merusaglia.
Dettu : « A ghjenti di Merusaglia sempre pronta à a battaglia ».
6 d’aprile 1865, Ghjiseppu Danesi, urilogiaiu in Bastia, ottene un brevettu pè a so invenzione d’un mecanìsimu per rimontà l’arilogi à l’orizontale. Dice Castellani ch’ella hè una vera rivuluzione à l’èpica. Danesi fà rigalu gratisamente di a so invenzione à un ingeniore svìzzeru. •
