Militente di a lingua, Carlu Castellani hè statu durante anni è anni una di e piume d’Arritti. Fundatore di Scola Corsa di Bastia in tempu di u Riacquistu, hà scrittu parechji libri, frà i quali sta Mémoire des Jours – Fatti è Detti. Usi, tradizioni, fatti, detti… Arritti ramenta quì qualchi sprichju di st’òpera volta annant’à a nostra cultura è a nostra stòria, ghjuvelli cù a lingua di l’ànima di u pòpulu corsu.
14 d’aprile 1960, Pierre Guillaumat, ministru delegatu à l’energia atòmica affacca in Aiacciu cù Francis Perrin, altu cummissariu, per « esaminà soprapiazza e pussibilità di creazione d’un centru d’esperimentazione nuclearia sottuterra » ind’è l’anziane mine di l’Argentella.
U ministru prova à rassicurà a populazione è Le Petit Bastiais intituleghja u s’artìculu : « A suluzione à u prublema corsu : a bomba atòmica ».
15 d’aprile di u 1736, Teodoru hè fattu rè di Corsica à u Cunventu d’Alisgiani.
15 d’aprile di u 1848, « L’Ajaccienne » sarebbe stata cantata pè a prima volta cù a venuta di u prìncipe Jérôme. U tinente culunellu Biancamaria scrive in La Corse dans sa gloire, ses luttes et ses souffrances (1963) : « e parolle sò di Jean François Costa (1813-1889). Fù cantata nant’à un ària pupulare corsu. A mùsica riceve a so forma definitiva in u 1881 da François Giacobini (1854-1913) ». È Carlu Castellani ci ampara chì Costa hè statu sottuprefettu di Sartè pò, prefettu di u Tarn, u Vaucluse, l’Hérault, è infine cunsigliere à a Corte di i Conti.
15 d’aprile 2009, a Corsica si dà l’immatriculazione naziunale chè no cunniscimu pè e so vitture. In u 1901, e lèttere DT èranu state imposte sin’à u 1950 induve a Corsica si vede attribuà un 20. In u 1974, novu scambiamentu, u 2 d’ottobre, u Cunsigliu di i ministri decide di sparte a Corsica in dui dipartimenti è dui anni dopu, u 1u di ghjennaghju 1976, a bidepartementalisazione hè effettiva. Tandu u 20 sparisce è hè rimpiazzatu da 2A pè a « Corse-du-Sud » (Pumonte) è 2B pè « Haute-Corse » (Cismonte).
16 d’aprile di u 1646, Munsignore Marliani, vescu di Mariana è d’Accia, visita a ghjesgia di San Ciprianu di Mursiglia.
U cunventu hè statu creatu in u 1479 da e pupulazioni di Mursiglia è Centuri, dice Carlu Castellani. In u 1560 hè sacchighjatu da i barbareschi. Da u 1914 à u 1918 diventa un campu d’internamentu pè i prigiuneri austro ungaresi.
17 d’aprile, San Nicetu, martoriu in l’annu 174. Castellani ramentu un pruverbiu : « Dopu à a timpesta vene à bunaccia ». •
