Militente di a lingua, Carlu Castellani hè statu durante anni è anni una di e piume d’Arritti. Fundatore di Scola Corsa di Bastia in tempu di u Riacquistu, hà scrittu parechji libri, frà i quali sta Mémoire des Jours – Fatti è Detti. Usi, tradizioni, fatti, detti… Arritti ramenta quì qualchi sprichju di st’òpera volta annant’à a nostra cultura è a nostra stòria, ghjuvelli cù a lingua di l’ànima di u pòpulu corsu.
3 di maghju. Festa di u Cristu Negru in a ghjesgia Santa Croce di Bastia custruita à a piazza d’una ghjesgiuccia dedicata à l’Annunziata à u XVu sèculu. Dice a tradizione chè di maghju 1428 Cristu Negru fù truvatu da dui piscatori bastiacci, Camugli è Giuliani. Spostu in San Ghjuvà, sparia è si truvava ogni volta à l’impiazzamentu di u so oratoriu oghje. Hè cusì ch’ellu s’hè custruita a ghjesgia Santa Croce da pudè accoglie Cristu Negru.
U 3 di maghju, i piscadori bastiacci dàvanu una parte di a so pesca à a ghjesgia. Hè classificata munumentu stòricu dapoi u 22 di ghjennaghju 1931.
4 di maghju di 1922, affacca in Corsica Alexandre Millerand (1859-1943), tandu presidente di a Repùblica francese. Dichjara in Aiacciu : « da u puntu di vista ecunòmicu, ùn hè nè raziunale nè lògica d’appiecà imperturbabilmente u stessu regulamentu amministrativu à a Corsica chì quellu di a Creuse o di a Lozère… »
4 di maghju di u 1976, creazione d’un novu gruppu clandestinu, u Fronte di Liberazione Naziunale di a Corsica (FLNC). Annunzia a so nàscita cù 21 attentati, è una distribuzione di stampini qualchi ora nanzu induv’ellu precisa u so prugramma : ricunnniscenza di i dritti naziunali di u pòpulu corsu, destruzzione di tutti i strumenti di u culunialìsimu francese, messa in ballu d’un putere pupulare demucràticu, cunfiscazione di e grande pruprietà culuniale è di i trust turìstichi, rialisazione di a riforma agraria, drittu à l’autodeterminazione dopu à un tempu transitoriu di trè anni.
5 di maghju di u 1992, si sfonda a tribuna di Furiani durante a mezafinale di cuppa di Francia SCB-OM. 19 morti è più di 2000 feriti in l’ammansu di ferame.
5 di maghju di u 1821. Morte in Sant’Elena di l’imperatore Napuleone 1u.
6 di maghju di 1817, nàscita di Munsignore de la Foata, Vescu d’Aiacciu (1877-1899). More in Aiacciu u 3 di ghjennaghju 1899.
7 di maghju di u 1882, Augustu Stretti hè u primu mere republicanu di Bastia.
9 di maghju di u 1769. Disfatta di Ponte Novu.
È u 9 di maghju di u 1978, u Sporting hè battutu da u PSV Eindhoven in finale di a cuppa aurupea di l’UEFA, 3 à 0.
10 di maghju. Hè l’Ascenzione di Cristu in cielu secondu à i cristiani, 40 ghjorni dopu à Pasqua. A cridenza pupulare dice ch’omu coglie l’erba di l’Ascenzione (sedum pourpier). Suspesa capu in ghjò, fiurisce sin’à a metà di ghjugnu. L’ovi di quellu ghjornu ùn merzìscenu micca è prutègenu e case di u tempurale è di a saetta.
È si dice chì quellu ghjornu « mancu l’ocellu ùn esce di u nidu », è « s’ellu piovi u ghjornu di l’Ascenzione ogni cosa và in perdizione ».
10-13 di maghju di u 1843, i Carbonari taliani chì s’èranu vultati contr’à l’Aùstrici, tròvanu accolta in Corsica. Sò più di 800 à sbarcà in Bastia. •
