Militente di a lingua, Carlu Castellani hè statu durante anni è anni una di e piume d’Arritti. Fundatore di Scola Corsa di Bastia in tempu di u Riacquistu, hà scrittu parechji libri, frà i quali sta Mémoire des Jours – Fatti è Detti. Usi, tradizioni, fatti, detti… Arritti ramenta quì qualchi sprichju di st’òpera volta annant’à a nostra cultura è a nostra stòria, ghjuvelli cù a lingua di l’ànima di u pòpulu corsu.
17 di maghju. Napuleone annessa Roma è abroga u Statu di u Vaticanu. U papa Pie VII u scumunicheghja. Dapoi tandu, i bastiacci u cugnòmanu « u scumunicatu ». Ellu i chjama « i calcinellai ». U calcinellu hè a bucarde in francese spieca Carlu Castellani chì ramenta ssu dettu nant’à Bastia : in Bastia à chì ùn hà solli ùn ci stia.
18 di maghju 1952. Hè u curunamentu di a pittura miraculosa di Lavasina in presenza di u nunziu apustòlicu Àngelo Giuseppe Roncali, futuru papa Ghjuvanni XXIII. L’autorisazione era stata ottenuta di marzu 1949 da Munsignore Lliosa, vescu d’Aiacciu.
19 di maghju. Hè San Teòfalu di Corti. Natu in Corti in u 1676, urdunatu prete in Nàpuli in 1699, hè canunizatu in 1930. Teòfalu more in Fucecchio in Toscana u 19 di maghju 1740. A nutizia corre « il santo è morto »,ognunu vole tuccà a so salma. Hè seppelitu in a pìccula ghjesgia tuscana. In u 1730, conta Castellani, hà vulsutu fundà un ritiru in Ferìngule ma hè statu impeditu. Tandu Castellani si dumanda s’ellu vene da quì u dettu : Ferìngule loghi senza lìmite è omi senza ragione.
Una lèttera papale u pruclama benedettu u 24 di sitembre 1895 è u 29 di ghjugnu 1930 u papa Pie XI u dichjara santu. Padre Alfonsi (u Babbuziu) scrive : « Nanzu à eri à San Petru in Vaticanu / A voce di l’altìssimu Pastore / Sulenne, decreto u supremo onore / À u santu curtinese è franciscanu. »
19 di maghju 1943, u bastimentu « Général Bonaparte » ch’assicurava a lea trà Aiacciu è Nizza, hè turpigliatu è affonda à u largu di Nizza. Ci hè 107 morti.
20 di maghju, hè Penticosta, ùn si travaglia micca dice Castellani ch’o senò : Chì travaglia in Penticosta si ne pente o tardi o tostu.
21 di maghju. Hè Santa Ristituta, martoria in Carthage à u Vèsimu sèculu. E so relìquie sarèbbenu state purtate in Calinzana à u VIèsimu sèculu. Vistiche rializate in u 1951 anu truvatu un sarcofagu cù qualchi ossa. U 20 di maghju 1952 munsignore Lliosa vescu d’Aiacciu ricunnosce st’ossi cum’è quelli di a santa. U 22 d’aostu 1954, u papa Pie XII face Santa Ristituta patrona di a Corsica.
22 di maghju. Hè Santa Ghjùlia. Cù Santa Divota, dice Castellani, hè patrona di a Corsica dapoi u 1809. Cun l’aiutu di i santi si entra in Paradisu.
23 di maghju 1928. More in Bastia u Duttore Morucci cugnumatu « u duttore di i pòvari ». Hè statu à l’urìgine di a stallazione d’un centru di radiulugia. •
