Militente di a lingua, Carlu Castellani hè statu durante anni è anni una di e piume d’Arritti. Fundatore di Scola Corsa di Bastia in tempu di u Riacquistu, hà scrittu parechji libri, frà i quali sta Mémoire des Jours – Fatti è Detti. Usi, tradizioni, fatti, detti… Arritti ramenta quì qualchi sprichju di st’òpera volta annant’à a nostra cultura è a nostra stòria, ghjuvelli cù a lingua di l’ànima di u pòpulu corsu.
24 di maghju 1926 in Padulella di Moriani, inaugurazione di a placca cummemurativa di a partanza in esiliu u 10 di ghjugnu di u 1739 in Nàpuli di Ghjacintu Paoli, Luigi Giafferi è u giòvanu Pasquale Paoli.
25 di maghju 1870, u serviziu pustale mette 14 ore per andà di Bastia à Aiacciu.
Carlu Castellani ramenta ssu dettu : » Viaghju, viaghju, è sempre sott’à u Borgu sò. «
28 di maghju 1832, nàscita di Petru Lucciana Vattalapesca, autore d’una quindecina di cumèdia è d’un drama liricu Maria Gentile, fundatore in u 1904 di a sucietà literaria A Cirnea è di a rivista Cirnu (1905-1908). Vattalapesca more in u 1909. Una placca hè stata sposta in u 1970 da l’associu Parlemu Corsu induv’ellu stava u pueta, 15 carrughju Campinchi in Bastia.
« O Bastia ti ne dissi tante è tante / Ch’hè onestu avà spiecatti u mo penseru / Eo porga ti vurria cum’è diamante / È di civile virtù spechju sinceru » (Vattalapesca).
28 di maghju di u 1769. Dopu à l’annessione di a Corsica à u reame di Francia, a munetta naziunale corsa hè svaluata di 40 % pò di 75 %.
29 di maghju 1767, a citatella di Capraia si rende à e truppe di Paoli chì l’avìanu assaltata dapoi u 16 di ferraghju. I Genuvesi anu pruvatu à parechje volte di sbarcà truppe in rinforzu ma sò rimbattute ogni volta. U 29 di maghju Capraia hè corsa. Spieca Castellani chì à stu mumentu i Genuvesi capìscenu ch’ùn sò più maestri di u mare è chì a Corsica hè persa per elli. Tandu vanu à chede l’aiutu francese sin’à vèndeli l’ìsula…
Spressione : Si ne pentutu cum’è a volpa in Capraia. Spieca Castellani, chì una volpe manghjèndu tutti l’agnelli, u pastore li face crede ch’in Capraia u bestiame pasce senza surveglianza.
A volpa si lampa in mare da Capicorsu. Ghjunta in Capraia stanca, s’avvede ch’ùn ci hè micca bestiame ind’è l’ìsula è si more di fame.
31 di maghju 1990, primu volu di a Cumpagnia Corse Méditerranée creata in u 1988 da l’Assemblea di Corsica.
Di maghju 1761, Corti (u paese di l’orsu) diventa capitale di a Corsica.
Detti : « Sè Corti avia un portu, d’Aiacciu è Bastia ne facia un ortu ». In tantu chì a spressione « Andà à vede i so parenti in Corti » vole dì andà in prigiò dice Castellani. •
