Militente di a lingua, Carlu Castellani hè statu durante anni è anni una di e piume d’Arritti. Fundatore di Scola Corsa di Bastia in tempu di u Riacquistu, hà scrittu parechji libri, frà i quali sta Mémoire des Jours – Fatti è Detti. Usi, tradizioni, fatti, detti… Arritti ramenta quì qualchi sprichju di st’òpera volta annant’à a nostra cultura è a nostra stòria, ghjuvelli cù a lingua di l’ànima di u pòpulu corsu.
4 di ghjugnu 1933, morte in Nizza di u prufessore Antone Bonifacio. Natu in Ersa (Granaghjolu) u 19 di ghjennaghju 1866, hè statu u primu à avè pruvatu à mette in ballu règule per unisce l’ortografia corsa, publichendu in u 1926 a Prima grammatichella corsa. Pueta, avia glurificatu u so paese : Oh quantu sò fieru / d’esse natu ind’a me Ersa / Hè un mazzu di bellezza / Di difetti affattu hè scherza…
Hè dinù unu di i funditore di a rivista L’Annu corsu.
4 di ghjugnu 1981 u Sporting Club di Bastia vince a coppa di Francia battendu Saint-Etienne. « Cusì vera chì a palla hè tòndula, a coppa di Francia francherà l’onda » avia strulagatu Natale Rocchiccioli, ramenta Carlu Castellani.
6 di ghjugnu 1808. Ripressione di u generale Morand in u Fium’Orbu. Lascia a Corsica in u 1812 è more d’aprile 1813. Di u so passagiu ind’è l’ìsula, ramenta Carlu Castellani, ci ferma st’imprecazione : Ch’ellu ti ghjunghji Morand.
A legenda dice chì una vechja rumana l’averia detta à u passagiu di Neron. Interrugatu nant’à st’auguru, averia rispostu « perchè dopo un tiranno ne vienne sempre uno peggiore ».
8 di ghjugnu 1575, a ghjesgia Santa Maria di Bastia diventa a catetrala induve i veschi càmpanu.
Spieca Castellani, ch’esistia à u XVu sèculu in Citatella di Bastia una pìccula ghjesgia chjamata Santa Maria della Consolazione. Era appiccata à un scogliu duv’ella hà presu u so nome pupulare Santa Maria l’Arrimbata. Cù a crèscita di a populazione, in u 1604, principia a custruzzione d’una nova catetrala cunsacrata in u 1625 da Munsignore Del Pozzo, vescu di Mariana (1622-1645). In 1619, principia a custruzzione di u campanile compiu in 1920.
8 di ghjugnu 1861, le Journal de la Corse dumanda à u guvernu d’annulà u passaportu trà Cuntinente è Corsica. Scrive : « quandu noi francesi di Corsica, vulemu andà nant’à u cuntinente francese, simu cunsiderati cum’è stranieri ».
Figlioli di gatti ùn ne nasce senza unghje, ramenta Castellani.
10 di ghjugnu 1853, si vota a lege d’interdizzione di purtà l’arme durante cinqu’anni in Corsica. Dice Castellani, l’autorità anu sempre luttatu in vanu contr’à u fattu di purtà l’arme, sin’à l’episcupatu chì à parechje volta, l’interdisce à i preti…
10 di ghjugnu 1801, l’arrestati Miot. Sò misure fiscale di redduzzione di dritti d’arregistramentu, suppressione di l’impòsitu nant’à porte è finestre, spieca Carlu Castellani, ma i prudutti corsi spurtati nant’à u Cuntinente francese anu dritti di dugana. A Corsica era dunque cunsiderata cum’è terra straniera, dice Castellani. I dritti sò annulati in 1912.
Di prumette è di mancà, ognunu a pò fà, ramenta Castellani. •
