Militente di a lingua, Carlu Castellani hè statu durante anni è anni una di e piume d’Arritti. Fundatore di Scola Corsa di Bastia in tempu di u Riacquistu, hà scrittu parechji libri, frà i quali sta Mémoire des Jours – Fatti è Detti. Usi, tradizioni, fatti, detti… Arritti ramenta quì qualchi sprichju di st’òpera volta annant’à a nostra cultura è a nostra stòria, ghjuvelli cù a lingua di l’ànima di u pòpulu corsu.
Da u 10 sin’à u 21 di ghjugnu 1794, Cunsulta di Corti chì vota a ruttura cù a Francia è a creazione d’un reame anglo corsu. Carlu Castellani ramenta un pruverbiu toscanu : « guerra con tutto il mondo e pace con l’Inghilterra ».
10 di ghjugnu, Festa di Diu (Corpus Domini, festa mobile). A festa era marcata da numarosi prucessioni. Secondu à a tradizione, i carrughji èranu sparsi di fiori colti a matina. A tradizione di a Festa di Diu (per d’altri, dice Castellani, à a San Pancraziu) era imposta à i pastori « di fà purice », vale à dì d’offre gratisamente à l’abitanti di u paese u latte di u ghjornu. U fattu hà datu nàscita à duie spressioni, conta Carlu Castellani : « e conta purice » (dice una bucia), è « ùn ne face chè purice » (ne face quant’è sette).
11 di ghjugnu 1794, a famiglia Bonaparte parte di a Corsica…
11 di ghjugnu 1954, inaugurazione di a stàtua di Pasquale Paoli in Corti. « Eccu nantu à u so sciappale / Di Sambucucciu è Pasquale / l’intrepida capitale » (Martinu Appinzapalu).
12 di ghjugnu 1849, nàscita in Bastia di Luigi Napuleone Mattei. In u 1894, mette à u puntu una formula – tenuta secreta – pè a fabricazione di u so vinu chinatu.
È Castellani di ramintà qualchi puruverbiu : U vinu ùn dice nunda ma palesa tuttu. Vinu mi faci parlà latinu. L’acqua face fangu è u vinu face bon sangue. Vinu rivuccatu segnu di bundenza. À chì hà pane è vinu pò invità u vicinu. Latte è vinu velenu fine, ma vinu è latte lascia scumbatte. A caccia senza mette a botte canta. Guàrdati da l’acetu è da u vinu dolce.
13 di ghjugnu, hè Sant’Antone in Bastia. U cunventu hè fundatu in u 1540 da u prete Martinu di u Nebbiu. Sant’Antone hè pricatu per ritruvà l’ogetti persi : « beatu Sant’Antone Diu vi hà datu u putere di ritruvà l’ogetti persi, fàtemi ritruvà… » Hè pricatu dinù per prutege in u tempurale : « Beatu Sant’Antone francàteci da a saetta è da u tonu ».
Ramenta torna Castellani chì i pastori di Niolu benedìscenu u so bestiame dicendu : « Beatu Sant’Antone, pruteggi a banda, u patrone è u rughjone ».
D’altri ramenti in u libru.
13 di ghjugnu 1769, Pasquale Paoli imbarca in Portivechju per l’Inghilterra…
13 di ghjugnu 1981, pè a prima volta di a so stòria, u Sporting Club di Bastia vince a coppa di Francia.
Castellani ramenta a rivalità trà bastiacci è aiaccini di l’ACA cù sta cacciata : « U Sporting ghjè in u fossu è l’ACA li piscia adossu ».
Ma si dice dinù u cuntrariu. •
