Militente di a lingua, Carlu Castellani hè statu durante anni è anni una di e piume d’Arritti. Fundatore di Scola Corsa di Bastia in tempu di u Riacquistu, hà scrittu parechji libri, frà i quali sta Mémoire des Jours – Fatti è Detti. Usi, tradizioni, fatti, detti… Arritti ramenta quì qualchi sprichju di st’òpera volta annant’à a nostra cultura è a nostra stòria, ghjuvelli cù a lingua di l’ànima di u pòpulu corsu.
15 di ghjugnu di u 1794. Una Cunsulta adunita in Corti rompe i leami cù a Francia è, u 19, adopra u documentu custituziunale chì crea u reame anglo corsu è si mette sott’à a prutezzione di l’Inghilterra.
Pruverbiu : « per chè l’amicizia si mentenga una sporta passa è l’altra vene », dice Castellani.
15 di ghjugnu di u 1854. A municipalità bastiaccia decide di cumprassi a stàtua di Napoleone, di u scultore fiorentinu Bartolini.
Un capatoghju hè statu di aduprà a scrizzione chì figura nant’à u basamentu, a ghjente si letica, certi a vòlenu in francese, d’altri in talianu, spieca Castellani. In fine chì, adòprenu u latinu !
Da u 15 à u 21 di ghjunu di u 1934, dui calvesi, Roccu Ambrosini è Antone Gabrielli, raghjùnghjenu Calvi à Nizza à a rama in sei ghjorni.
16 di ghjugnu di u 1982, morte accidentale in Bastia, di Munsignore Ànghjulu Giudicelli, vicariu generale d’Aiacciu. Natu in Pinu in u 1906, era un difensore di a nostra lingua. Dicia : « un pòpulu ùn pò stà sempre à lingua in prestu ». In u 1976, avia publicatu u librettu Messa nustrale, cù u sustegnu di Monsignore Thomas, vescu di Corsica, ch’avia scrittu in u prefaziu : « In tutte e lingue, Diu deve esse celebratu, cantèmulu dinù in a lingua di a Corsica ».
17 di ghjugnu di u 1751. A Cunsulta d’Orezza urganizeghja a stallazione d’un veru guvernu .
Pruverbiu : « Omi d’Orezza è donne d’Alisgiani, fàcenu figlioli cum’è fasgiani »
17 di ghjugnu di u 1943. Morte di i resistenti Ghjuliu Mondoloni è Andria Giusti, ind’un azzuffu contr’à l’occupante talianu.
18 di ghjugnu di u 1830. Primu battellu à vapore, u Liamone, chì si move cù ritrecine. 33 metri di longu, entre in Aiacciu, vinendu da Tulò. A marina à vela hà campatu.
Nannarella bastiaccia : « parte u vapore / per mare si ne và / lascia à … (nome di u ciucciu viculatu) / à pienghje è à suspirà ».
19 di ghjugnu di u 1965, si chjode a mina di tigliu in Cànari. Castellani ne prufitta per ramentà l’usine ch’anu funziunatu in Corsica : l’usina di ramu in Cardu (Bastia) (1868-1897). Dinù in Canavaghja, Omessa, Olmeta di Tuda, Marignana è Castifau, per intermittenza da 1858 à 1914. L’usina d’antimonia d’Ersa (1850-1919), di Mèria, Calinzana è Luri. L’usina di piombu in Ghisoni (1920-1957), d’arsenicu in Matra (1889-1946), di ferru in Ferrìngule, di zingu in Ghisoni… •
