Militente di a lingua, Carlu Castellani hè statu durante anni è anni una di e piume d’Arritti. Fundatore di Scola Corsa di Bastia in tempu di u Riacquistu, hà scrittu parechji libri, frà i quali sta Mémoire des Jours – Fatti è Detti. Usi, tradizioni, fatti, detti… Arritti ramenta quì qualchi sprichju di st’òpera volta annant’à a nostra cultura è a nostra stòria, ghjuvelli cù a lingua di l’ànima di u pòpulu corsu.
23 di ghjugnu di u 1774, dopu à l’insurezzione di u Niolu, òndeci abitanti sò impiccati è 34 mandati in Tulò induve e cundizioni di detenzione i fàcenu more in fùria.
« Niolu valle di misteru incaghjata in u so senu ».
23 di ghjugnu, a notte a più corte di l’annata, festighjata in Bastia cù u fucarè. I zitelli sò autorizati à bagnassi in mare. Nanzu di ciuttà ind’è l’acqua, l’usu impone ssu dialogu : « Chì acqua sì ? Acqua di San Ghjuvà. U signore ci accumpagni ». È omu si lampa ind’è l’acqua, spieca Carlu Castellani.
24 di ghjugnu, hè a San Ghjuvan’Battista. A ghjesgia in Bastia hè stata custruita trà 1636 è 1666, conta Castellani. U secondu campanile hè statu aghjustatu à u XIXu sèculu.
24 di ghjugnu di u 1774, sbarca in San Fiurenzu u regimente di Picardia per dumà i Corsi. In e so memorie, un suldatu di u regimente scrive chì u contu de Vaux ùn guverna chè à rombu d’editi è quandu i pudestati ch’ùn sapìanu leghje u francese, ùn l’appiècanu micca, De Vaux « per imparali, li mandava esecuzioni militare »…
25 di ghjugnu di u 2014, u FLNC mette fine à e so attività.
27 di ghjugnu di u 1907, a Càmera di i deputati mette in ballu una cumissione incaricata d’esaminà un prugettu di lege di lotta contr’à u paludìsimu. A malatia arruina a Corsica dapoi u XVu sèculu. Digià l’abitanti di a piaghja di u Golu dumandàvanu à l’Uffiziu di San Ghjorghju in u 1480 d’intervene. Ma di cumissione in prugettu di lege, nunda ùn move. Ancu a lege di u 1807 chì dà a u Statu a càrica di l’assiccamentu ùn s’appieca à a Corsica. In u frà tempu, a malaria decima a pupulazione di piaghja orientale custretta à fughje. Ci volerà aspettà l’arrivata di e truppe americana in u 1943 da ch’elle regulèghjinu u prublema, spieca Castellani.
29 di ghjugnu di u 1989, l’Assemblea di Corsica adopra una muzione (47 voti contr’à 4 astenzioni) dumandendu chì a lege d’amnistia di u 14 di lugliu sia appiecata dinù à i naziunalisti imprigiunati o perseguitati.
30 di ghjugnu di u 1957 u guvernu adopra un Pianu d’Azzione Regiunale pè u sviluppu ecunòmicu di l’ìsula. Duie sucietà miste sò create, a Somivac pè a messa in valore agrìcula è a Setco, pè u turìsimu. Ma e brame seranu di corte andà. Cù l’indipendenza di l’Algeria, spieca Castellani, 17.000 pedineri, vale à dì 10 % di a pupulazione sbàrcanu in Corsica. Benefizièghjanu di misure d’aiute, pruvuchendu manifestazioni. •
