Militente di a lingua, Carlu Castellani hè statu durante anni è anni una di e piume d’Arritti. Fundatore di Scola Corsa di Bastia in tempu di u Riacquistu, hà scrittu parechji libri, frà i quali sta Mémoire des Jours – Fatti è Detti. Usi, tradizioni, fatti, detti… Arritti ramenta quì qualchi sprichju di st’òpera volta annant’à a nostra cultura è a nostra stòria, ghjuvelli cù a lingua di l’ànima di u pòpulu corsu.
3 di lugliu. San Tumasgiu, prutettore di i macellari. Per ride, a curpurazione hà trasfurmatu u dettu pupulare « San Tumasgiu vole vede è tuccà », in « San Tumà vole beie è manghjà ». San Tumasgiu hè festighjatu in Belgudè è in Èccica Suarella.
Dettu : « Aghju vistu Belgudè quantu Belgudè hà vistu à mè ».
3 di lugliu di u 1793, a Corsica hè spiccata in dui dipartimenti (Golu è Liamone). Castellani ramenta à l’uccasione u caminu di a decentralisazione in Corsica. U decretu di u 9 di ghjennaghju di u 1970 face di l’ìsula una circuscrizzione d’azzione regiunale. A so assemblea (Codec) hà solu un putere cunsultativu è hè cumposta di 30 membri (parlementarii, raprisententi di u Cunsigliu generale, càmera di i mistieri, persunalità designate da u primu ministru). U 5 di lugliu di u 1972, una lege dà à u cunsigliu regiunale un rolu di pruposta ecunòmica è suciale. 32 membri designati frà l’urganisazioni prufessiunale anu una vucazione cunsultativa. U 15 di maghju di u 1975, a lege crea a bidepartementalisazione cù u scopu di « riiquillibrà a vita amministrativa di e duie grande cità di l’ìsula ».
A lege di u 1982 porta in 1983 à l’elezzione à u suffragiu universale prupurziunale d’un « Assemblea di Corsica » di 61 membri cù dui cunsiglii consultativi. L’attribuzioni pulìtiche sò minchjò : gestione di i trasporti, idròlica è agricultura, agenzia di u turìsimu è stabilimenti sculari di u secondu gradu. Infine, a lege Joxe in u 1991, face di a Corsica una Cullettività territuriale di a Repùblica cù un statutu specìficu sfarentu di l’altre regioni francese…
3 di lugliu di u 1850, nasce in Azzana Santu Casanova chjamatu Ziu Santu. Passa a so zitellina in Àrburi, u so paese d’urìgine. In u 1896 fonda A Tramuntana cù u sottutìtulu « fresca è sana ». L’ùltimu nùmaru esce u 9 di maghju di u 1914. Ziu Santu more u 27 di dicembre di u 1927.
7 di lugliu di u 1925, nàscita di l’umuristu Tintin Pasqualini, ch’hà fundatu è animatu u cabaret « U Rataghju ». Per traduce TVA, per un dettu, dicia : tuttu hà da cresce (in francese Tout Va Augmenter).
8 di lugliu di u 1912. A lege duganera ch’impunia tasse trà Corsica è cuntinente francese hè abulita. Sola ferma una tassa favurèvule à l’ìsula nant’à u tabaccu è l’alcolu.
8 di lugliu di u 1983, l’Assemblea di Corsica adopra una muzione per dumandà l’insignamentu ubligatoriu di a lingua corsa à a scola primaria.
U primu ministru Pierre Mauroy ricusa diciendu chì « s’impara bè solu ciò ch’ùn hè micca impostu ».
9 di lugliu di u 1769. U Contu De Vaux hè numinatu guvernore generale di a Corsica. Secondu Choiseul, ùn ci hè megliu per mantene a Corsica sottumessa pè a tranquillità di l’ìsula. L’Ìsula, a cità fundata da Paoli, piglia u nome di Vaux-sous-L’Ile Rousse. Nome ridottu in L’Ile-Rousse in u 1788. Ma, dice Castellani, ancu oghje ferma sempre L’Ìsula pè i Balanini. •
