Militente di a lingua, Carlu Castellani hè statu durante anni è anni una di e piume d’Arritti. Fundatore di Scola Corsa di Bastia in tempu di u Riacquistu, hà scrittu parechji libri, frà i quali sta Mémoire des Jours – Fatti è Detti. Usi, tradizioni, fatti, detti… Arritti ramenta quì qualchi sprichju di st’òpera volta annant’à a nostra cultura è a nostra stòria, ghjuvelli cù a lingua di l’ànima di u pòpulu corsu.
11 di lugliu di u 1940, Vichy vota i pieni puteri à u maresciale Petain. Parte di a Corsica, César Campinchi ùn ci hè, dunque ùn vota micca, Adolphe Landry s’astene, Musso, Rocca Serra è Pitti Ferrandi vòtanu à favore. Solu Paul Giacobbi vota contra.
Ramenta Catellani : « u mele si fà liccà o fele sputà ».
13 à u 15 di lugliu di u 1755, Cunsulta à u Cunventu di Sant’Antone di A Casabianca. Pasquale Paolli hè elettu Capo Generale della Nazione, rispunsèvule di u putere esecutivu.
14 di lugliu di u 1790, Pasquale Paoli sbarca in Macinaghju, vultendu di u so primu esiliu in Inghilterra. U 17 hè acclamatu da u pòpulu in Bastia.
14 di lugliu di u 1845, una lege decide a custruzzione d’un portu in Bastia. A custruzzione principia 20 anni dopu. « Ne si unghje, ne si bara » dice Carlu Castellani. Quand’omu mettia una barca à l’acqua, si fecia sculisce nant’à duie raglie in legnu unta di sapone è dopu si piazzava u timone (a bara), a spressione s’usitava per dì ch’un prugettu a s’allungava.
14 di lugliu di u 1980, l’emettore di Radio Corsica Internaziunale in Monte Capanna in l’Ìsula d’Elba hè plasticatu. RCI era stallatu carrughju Napuleò in Bastia è culmava un viotu. Castellani ramenta tutt’a stòria di l’emissione in Corsica, da Francia cuntinentale, d’Italia, d’Àfrica… Trà u 1942 à a fin’d’aostu di u 1943, l’infurmazione hè trasmessa da Radio France Alger è ci hè ancu un emissione in lingua corsa da u 29 di lugliu à a fin’di sittembre di u 1943.
Da leghje i detaglii nant’à Fatti è Detti, pàgine 139 è 140.
18 di lugliu di u 1840, e pisciaghje in Bastia ùn rispèttanu micca l’arrestatu di u 1u di lugliu ch’autorizeghja solu a vèndita di pesci da 9 ore à 11 ore è da 2 ore à 4 ore dopu meziornu. Si làgnanu i Bastiacci. Castellani ramenta u dettu pupulare : « orechja manca core francu, orechja dritta core afflittu », è ne cunclude chì l’orechja di u merre duvia frischjà senza arrestu.
20 di lugliu di u 1572, l’abitanti di Vezzani màndanu una petizione à u guvernatore di a Corsica da ch’ellu autorizeghji un certu Salvatore di Bonello di purtà l’arcusgiu per difèndeli contr’à l’orsi. A prisenza di l’orsu in Corsica, dice Castellani, si cunferma cù a scuperta d’ossi in u 1907 da un paleontologu inglese ind’una grotta di Monte Estremu in u Falasorma. Oghje l’animale hè sparitu ma fèrmanu numarosi toponimi : Grotta à l’orsu in Guagnu, Tana à l’Orsu in u Monte Estremu, Pian’di l’Orsu in Vezzani, l’Ursaghja in Siscu…
A legenda conta chì i Genuvesi ùn pudianu vince i Corsi, tandu anu cappiatu orsi ma i Corsi l’anu tumbati tutti fora di qualchi d’unu chì si sò piatti in une poche di grotte. •
