Militente di a lingua, Carlu Castellani hè statu durante anni è anni una di e piume d’Arritti. Fundatore di Scola Corsa di Bastia in tempu di u Riacquistu, hà scrittu parechji libri, frà i quali sta Mémoire des Jours – Fatti è Detti. Usi, tradizioni, fatti, detti… Arritti ramenta quì qualchi sprichju di st’òpera volta annant’à a nostra cultura è a nostra stòria, ghjuvelli cù a lingua di l’ànima di u pòpulu corsu.
1u di ferraghju. In u 1888, apertura di a lìnea ferruviara Bastia-Corti. Scrive Le Petit Bastiais : « Hè u prugressu tantu bramatu… avemu cuscenza chì u nostru paese caru entre in un èpica nova, tuttu s’hà da trasfurmà ».
In 1970, in Corti, sò l’elezzioni municipale : cù 4303 scritti, ci sò 9647 vutanti ! Ammiràbile slanciu civicu è demucràticu, cummenta Carlu Castellani.
2 di ferraghju. Hè a Candilara… a ghjesgia festighjeghja a presentazione di Ghjesù à u tèmpiu. Tandu si porta un cironu incesu durante a messa. Vene da quì u nome di a Candilara o Ciriola, dice Carlu Castellani chì ammenta dinù sti dui detti :
– Santa Maria Ciriola, s’ellu piove o fà neve, di l’imbernu simu fora. S’ellu hè sole o bellu tempu di l’imbernu n’avemu ancu.
– L’acqua passata ùn macina più.
4 di ferraghju. In u 1934 in Ortiporiu, un nivaghjone pruvucheghja una sfraiata nant’à una parte di u paese. U bilanciu hè tremendu : 37 morti è numarosi feriti.
5 di ferraghju. In u 1807, more Pasquale Paoli in Londra.
6 di ferraghju. In u 1794, Pasquale Paoli (pruclamatu generalissimu à a Cunsulta di u 26 di maghju 1793), hè incaricatu di a difesa di u territoriu. Chjama l’inglesi chì màndanu un esquadra da assedià i porti di l’ìsula. Nelson sbarca in Centuri induv’ellu brusgia quattru battelli. L’8 in Macinaghju ne brusgia ottu. U lindumane scala in Lavasina è u 20 sbàrcanu milla omi nant’à a piaghja di Miomu. Assèdianu Bastia parte nordu cù i Corsi chì pìglianu pusizione parte sud. A cità hè accampata durante 40 ghjorni. Hè una stirpera è Bastia si rende u 29 di maghju. Nelson tocca Calvi l’8 di ghjugnu. A cità famita, senza munizioni, capituleghja u 5 d’aostu. In u frà tempu, u 12 di lugliu, Nelson perde l’ochju destru ramenta Carlu Castellani.
6 di ferraghju torna. In u 1998, u prefettu Erignac hè assassinatu in Aiacciu. L’azzione hè rivendicata cum’è « un attu pulìticu chì pone à u livellu internaziunale l’avvene di a Corsica ». Trè ghjorni dopu, affacca u prefettu Bonnet per ristabilisce u statu di drittu… U 7 di marzu 1999, schiatta l’affare rucambulesca detta di e « paillottes ». Bonnet hè piazzatu in guardia custoghja. Serà cundannatu à trè anni di prigiò, frà i quali un annu fermu in 1996, ammenta Carlu Castellani. •
