Militente di a lingua, Carlu Castellani hè statu durante anni è anni una di e piume d’Arritti. Fundatore di Scola Corsa di Bastia in tempu di u Riacquistu, hà scrittu parechji libri, frà i quali sta Mémoire des Jours – Fatti è Detti. Usi, tradizioni, fatti, detti… Arritti ramenta quì qualchi sprichju di st’òpera volta annant’à a nostra cultura è a nostra stòria, ghjuvelli cù a lingua di l’ànima di u pòpulu corsu.
9 di ferraghju. In sèguita à a Cunsulta di Corti in 1794 chì rompe i leami cù a Francia è mette in ballu u reame anglocorsu, u 9 di ferraghju di u 1795, in l’oratoriu di l’Immacculata Cuncezzione, si tene a prima riunione di u reame sott’à a presidenza di u vicirè, Sir Gilbert Elliot.
9 di ferraghju sempre, ma sta volta in u 1829, u ghjùdice di pace di San Niculau, in una lèttera ch’ellu scrive à u sottu prefettu di Bastia, cunfirma l’esistenza dapoi u 1818 d’una sucieta secreta di carbunari ch’hà ghjuratu u so odiu eternu à e monarchìe. I partisgiani di Paoli, dopu à a battaglia di Ponte Novu, fòndanu una contr’ammuratura detta « i Beati Paoli ». Dice Carlu Castellani ch’elli èranu sicuramente numarosi postu ch’elli anu datu nàscita à a spressione : « sò quantu i Beati Paoli ».
11 di ferraghju 1972, sò millaie di Corsi à sfilà in i carrughji bastiacci per dinunzià u scàndalu di e fanghe rosse in u canale di Corsica cù a sucietà Montedison. A sottuprefettura hè assaltata è u sottuprefettu scuzzulatu. Edimondu Simeoni, capifila di l’ARC è Vincente Duriani, aghjuntu à u merre di Bastia, sò imprigiunati 10 ghjorni.
L’annata dopu, u 15 di sittembre 1973, u riboccu di fanghe rosse hè infine interdettu da a ghjustizia taliana.
14 di ferraghju. San Valentinu. « À chì vinti ùn sà è a trenta ùn hà mai sappiutu è mai ne saperà ».
14 di feraghju 1661, si custruisce un molu à a marina di PortuCardu. Vulsutu dapoi u 1604, ma ricusatu da Gènova.
A deliberazioni di i Nòbili Dòdeci u 14 di ferraghju 1661 cunvince u Senatu genuvese è a custruzzione principia in u 1670. Hè compia in u 1674 è dà à Bastia un portu induve ponu entre sin’à sei o sette galere è altri pìcculi vascelli. Dui sèculi dopu, ci hè vulsutu pensà à custruisce un antru portu. Cum’è oghje, dice Carlu Castellani chì cummenta « in fine chì a stòria di a custruzzione d’un portu rivene ind’è l’attualità praticamente tutti i dui sèculi ».
15 di ferraghju 1855, s’affonda La Semillante in e Bocche di Bonifaziu. A nave purtava suldati in Oriente. Nant’à 750 passageri è marinari, nimu ùn hè statu salvatu. •
