Militente di a lingua, Carlu Castellani hè statu durante anni è anni una di e piume d’Arritti. Fundatore di Scola Corsa di Bastia in tempu di u Riacquistu, hà scrittu parechji libri, frà i quali sta Mémoire des Jours – Fatti è Detti. Usi, tradizioni, fatti, detti… Arritti ramenta quì qualchi sprichju di st’òpera volta annant’à a nostra cultura è a nostra stòria, ghjuvelli cù a lingua di l’ànima di u pòpulu corsu.
15 di ferraghju di u 1871, à a Càmera di i deputati, u duttore Peyrisseau prisenta una petizione chì dumanda « la séparation immédiate de la Corse d’avec la France et l’exclusion immédiate des députés insulaires et au besoin du territoire français ».
Pruverbiu ramentatu : « À a fica zemba ognunu s’arrimba ».
15 di ferraghju sempre, ma di u 1535, in Milano, nasce Santu Lisandru Sauli, Vescu d’Aleria. Percorre a Balagna è multiplicheghja i miràculi chì guarìscenu. Si dice, ramenta torna Carlu Castellani, ch’in Lavatoghju, hà datu fichi à malati ch’anu guaritu sùbitu dopu.
17 di ferraghju di u 1969, una sfraiata si porta in Ascu quatru personi.
18 di ferraghju. Hè San Simeone, martoriu in 107. Festighjatu in Mòita.
Pruverbiu ramentatu : « À Muidinchi e panche à Curtinesi e carree ».
Hè dinù Santa Bernadetta Soubirou (1844-1879) ch’hà vistu parechje apparizioni di a Vèrgine in Lourdes.
Sempre un 18 di ferraghju, di u 1957, creazione di a SOMIVAC (Sucietà di messa in valore agrìcula di a Corsica). Hà da fà un impurtante travagliu per ammaestrà l’acqua per l’agricultura è l’acqua da beie. Da u 1957 à u 1983, hà da rializà ottu matrali idròlichi, una quarantina di stazioni per pumpà l’acqua è à pocu pressu 1450 chilòmetri di canalisazioni.
Ma cù i culoni rapatriati d’Algerìa, a SOMIVAC hà da diventà un arnese à u so serviziu. A distribuzione di e terre ch’èranu prumesse à i Corsi hà da creà frustrazioni ch’anu da cunduce à cunfronti dulurosi, spieca Carlu Castellani.
20 di ferraghju. Hè Carnavale. Dopu Carnavale vènenu e Cènnere dice Carlu Castellani chì ramenta stu pruverbiu : « In questa nostra parochja à chì stenta à chì scurnochja ».
21 di ferraghju di u 1798. Esecuzione di Agustinu Giafferi ch’avìa presu u capu di a rivolta contr’à a Francia. Sta rivolta detta « A Crucetta », per vìa di a pìccula croce bianca ch’elli purtàvanu l’insurretti, hè stata reprimata di manera viulente. Ripressione chjamata « A Francisata » ci dice Carlu Castellani.
U 21 di ferraghju di u 1916, u primu permessu di cunduce hè datu in Corsica.
22 di ferraghju di u 1860, venendu da Livorna, u bastimentu à vapore La Louise manca l’entrata di u portu è si sbremba nant’à i scoglii. Solu una trentina nant’à l’84 passageri anu da salvassi. •
