Torna una donna tomba da u so cumpagnu u 16 di sittembre. Ella, 23 anni, mamma di trè zitellucci, ellu, 30 anni è già cundannatu per viulenze contr’à a so cumpagna di ghjugnu scorsu. I vicini si sò lagnati parechje volte di mughji è rumori di calci è pugni. Ma a corcia donna, di paura, ùn hà vulsutu purtà lagnanza in ghjustizia è u tribunale avìa cundannatu l’omu solu à un stasgiu di rispunsabilisazione per l’autori di viulenze cunghjugale… Eccu. Ùn hè bastatu. I spendifochi sò chjamati per porghje aiutu à a curciarella in Tulusa. Soprapiazza, tròvanu una donna incusciente, u visu carcu à ematomi, i so zitellucci di 4 anni, dui anni è qualchi mese, à cantu à ella. Poche ore dopu, u babbu si rende à a pulizza.
Sò oghje 82 vìttime di viulenze dapoi u principiu di l’annu, 82 à ùn avè truvatu prutezzione, malgratu l’alerte è e chjame à u succorsu. Èranu 102 in 2020, sò circa 213.000 e donne à esse vìttime di viulenze ogni annu. È quantu ch’ùn dìcenu nunda ??
Una simana nanzu, u 7 di sittembre ind’è u Tarn, hè una donna di 62 anni ch’hè stata assuffucata da u so cumpagnu di vita di 34 anni, in sborgna. U 23 di lugliu è u 16 d’aostu, à duie riprese dunque, l’omu era statu interpellatu per viulenze è duvìa esse ghjudicatu u 10 di ghjennaghju è u 7 di ferraghju pròssimu. A s’hè tumbata nanzu…
U 6 di sittembre, un antra donna, di 38 anni, mamma torna di quattru cinnini, hè stata tomba à cultellate in Montélimar. I zitelli di 5 à 15 anni èranu prisenti quand’ellu hè accadutu u drama. A corcia donna s’era spiccata da u so boiu dapoi qualchi simana, hà pruvatu à fughje quand’ellu hè ghjuntu à truvalla, ma l’hà perseguitata è stilletata à parechje volte. S’hè morta in un bagnu di sangue.
L’associi di difesa di e donne marturiate dumàndanu di fala finita cù e chjàchjere è chèrenu un grande pianu d’azzioni : furmazioni di i servizii di pulizza è di ghjustizia, aumentu di e piazze d’accolta d’urgenza, di notte cum’è di ghjornu, braccialetti eletrònichi per impedisce l’omi viulenti d’avvicinassi di e so vìttime, evizzione di a casa pè u maritu o u cumpagnu viulente da prutegge e donne minacciate, pèrdita di i dritti parentali pè u maritu o u cumpagnu viulente, da ch’ellu ùn possi avvicinassi nè di a moglie nè di i zitelli, educazione à e rilazioni affettive o sessuale per imparà à st’omi viulenti (à le volte, ma di manera scarsa, à donne viulente dinù) u rispettu di a donna, per imparali à resiste à e tentazione di viulenza è à a so vuluntà di duminazione. Un corpu di pulizza speciale, unicamente vultatu versu ssi prublemi di viulenza è a prutezzione à porghje à sse donne minacciate sarebbe forse u mezu u più efficace è dissuasivu. In tutti casi, permetterebbe à sse donne di truvà un ascolta è un sèguitu di a so lagnanza chì puderebbe esse abbastanza preventivu.
Ùn ci hè altru mezu di risponde à ssu fragellu : fà una priurità di a lotta contr’à e viulenze fatte à e donne hè un imperativu. •
