U sognu principia 15 anni fà. U naziunalìsimu esce ammalappena d’un èpica tremenda di viulenza, di dùbitu, di stirpera… ugnunu prova à ricustruìscesi, si parla di bisognu d’aggiornamento, ma omu si fieghja sempre in catarochju… Hè tandu chì uni pochi di militenti ghjunti da e duie famiglie di u naziunalìsimu si mèttenu in giru à un tavulinu. Autunumisti di e prim’ore, anziani di a Lotta di Liberazione Naziunale si pàrlanu. Ssi primi passi i pòrtanu à u 7 di dicembre 2002, a nàscita di u Partitu di a Nazione Corsa. U muvimentu si vole arradicatu à « l’àvviu patriottu», ma dinù « saltu qualitativu», da scrìvesi in a mudernità, bramèndusi partitu forte, annacquatu da e lotte di u muvimentu naziunale ma capace d’àpresi à l’internu di a sucietà corsa è à l’internaziunale, è d’indità cusì a presa di rispunsabilità pè u naziunalìsimu corsu. Sarebbe pretenziunosu di pensà chè no èramu soli à avè brama è forza, ma simu i primi à avè francatu u passu!
D’altri dopu ci anu raghjuntu, ugnunu cù a so fede, a so forza è a so vuluntà indispensèvule, è c’hè vulsutu torna à francà uni pochi di passi, l’uni è l’altri, per ghjunghje à a maturazione di ss’andatura nova. Una custruzzione pulìtica hè di longu andà, è si face di e sperienze d’ugnunu. Ci hè vulsutu à francà i raporti di forza, custruisce a cunfidenza, cunvìncesi di a brama cumuna è di l’interessu di a sulidarità…
Dapoi deci anni avà, PNC, Inseme pè a Corsica è Chjama Naziunale viàghjanu inseme. I primi passi si ne còllanu à u 2007 cù legislative sott’à a chjama « Inseme pè l’avvene »… Pò ci sò state e vittorie municipale di u 2008, elezzioni aurupee di 2009, territuriale di 2010, cantunale di 2011, legislative di 2012, municipale di 2014…
À tempu, da i so pusiziunamenti, Femu a Corsica travaglia à a surtita di a viulenza pulìtica. A clandestinità porghje a so cuntribuzione di ghjugnu 2014, piantandu l’azzioni armate da permette l’unione di secondu giru appughjatu da i Corsi. I risultati ùn si fàcenu aspettà. Di marzu, primu terramotu, a vittoria di Gilles Simeoni in Bastia hè segnu chì u sognu hè pussìbule. Chì u pòpulu maturisce. Chì a porta di l’avvene s’abbacindeghja. 2015, terramotu. I naziunalisti corsi ghjùnghjenu à e rispunsabilità.
Pòpulu in carrughju à fà festa è ceremònia di u ghjuramentu, si scrive a stòria. 2017, trè deputati naziunalisti corsi èntrenu à u Palazzu Bourbon in Parigi.
Sse vittòrie abbagliulente sò gioie ma dinù rispunsabilità tremende. Puru, a custruzzione hè fràgile.
L’infurmazioni ùn ponu esse date da l’eletti tracarchi di travagliu, i militenti si sèntenu sclusi d’un avventura magnìfica è chèrenu da mette manu in pasta, e cumpetenze à mezu à u nostru pòpulu ùn ghjùngjenu à esse mubilizate, i dibàttiti ùn tròvanu più piazza, e scelte ponu esse cuntestate, l’invistiture tàrdenu troppu, a messa in ballu di l’azzione pulìtica cutidiana ùn ghjunghje à fassi… bisognu à dassi a forza d’un muvimentu urganizatu, un veru partitu di guvernu, capace d’urchestrà è di cuurdunà l’azzione pulìtica à tutti i livelli è di mette in rilazione eletti è militenti. I nostri capifili dèvenu avè ssu curagiu è ssa forza di sdrughje i partiti à u senu d’un solu. Hè quessu u « saltu qualitativu» ch’hà da fà Nazione.
Ci vole à fà Femu.
Fabiana Giovannini.
