Sàbatu u 26 di lugliu in Corti è dumènica u 27 di lugliu in Èvisa, Tutti in Piazza v’invita à Festiballu, a festa di u viulinu. À u prugramma, atteli per ballà, cunferenze, è ben intesa, balli è mùsica. Da beie è da manghjà !
L’invitati quist’annu seranu irlandese, cù Seamus et Fidelma Bellew, Padraig et Roisin Mc Eneany, Mary Comboy, Martin Hugues et Shane Donnelan.
Cù i musicanti di Tutti in Piazza, Minicale, Laurence Felici, Battì Paoli, Laurent Barbolosi, Padoue Ortoli…
Eccu u prugramma.
Sàbatu u 26 di lugliu in Corti
Dopumeziornu da 4 ore è mezu à 6 ore mezu : l’attelli di quadrigliu corsu pè i principianti è di set irlandese pè i cunfirmati.
A sera à 9 ore è mezu : grande ballu cù musicanti corsi è irlandesi.
À u prugramma, quadrigliu corsu pè i principianti è pè i cunfirmati, balli cullettivi aperti à tutti, set dancing irlandese, è in grazia à l’urganettu di Padoue, tangò, passò, valse, in un bellu mischiu per cuntentà à tutti !
Prisentazione dinù di u Corsican Set, u quadrigliu corso irlandese cuncepitu da Padraig et Roisin Mc Eneany et messu in ballu cù i ballatori di Tutti in Piazza. Stu set (quadrigliu) ripiglia e fiure di u quadrigliu corsu in a forma di i set irlandesi. U scopu hè di spàrtellu in i balli corsi è Tutti in Piazza brama dinù di vèdelu in i ceilis (balli) irlandesi.
Dumènica u 27 di lugliu in Èvisa
Ghjurnata d’umagiu à Zìu Battì, « U » sunatore di viulinu d’Èvisa, oghje smenticatu.
Era scarpaghju è omu avìa truvatu in a so casa, un viulinu in forma di scarpu ch’ellu avìa fattu ellu stessu. U viulinu hè smaritu, ma a legenda merita di sopravive.
Da 6 ore à 7 ore : Minicale, zitellu di u paese, cunterà ciò ch’ellu hà pussutu racoglie di a vita di Zìu Battì.
Da 7 ore à 8 ore : aperitivu offertu da a cumuna d’Èvisa.
À pàrtesi di 9 ore : mùsiche è balli cù tutti i musicanti è quelli chì vuleranu raghjùnghjeli. •
