Dapoi u 1982, ci rigala di tutti i so frutti è sapori nustrali… a fiera di a castagna ci dà appuntamentu sta dumenicata, l’8, u 9 è u 10 di dicembre in Bucugnà !
Hè tempu di scuntrà artisgiani è pruduttori, tempu di ritruvassi è sparte e bellezze di a nostra cultura, tempu di cuntrastà di u travaglione fattu dapoi u 1982 per rinvivisce i castagneti è u so àrburu rè ch’hà nutritu tante è tante generazioni di Corsi. Tempu infine di i vostri rigali di Natale, affaccàtevi sta dumenicata in Bucugnà !
Ci truvarete mostre d’artisgiani, dibàttiti, cuncerti cù Eppò à 9 ore di sera sàbatu, l’Intrecciu in prima parte à 6 ore, è a Scola di Cantu di Natale Luciani dumenica à 3 ore ; senza scurdassi di u risturante di a fiera cù a so pulenda di farina castagnina AOP di Bucugnà, u so ficatellu artisgianale, u so brocciu AOP arricatu da Casgiu Casanu, o sè vo preferite, u tianu di vitella à l’usu tradiziunale, cucinatu da l’alevi di u LEP di U Finusellu !
Bucugnà hè u sìmbulu di a rinàscita di l’interiore. In tempu di u riacquistu ind’è l’annate 70, uni pochi ci anu credutu creendu st’appuntamentu nustrale natu 40 anni fà ! Hè diventatu l’appuntamentu di a qualità è di l’identità, cù u so cuncorsu regiunale dapoi l’83, i so pianti vinduti è suminati in tutta a Corsica, i numarosi prudutti nati di u castagnu è da pruduttori creativi, i scontri cù ghjente ghjunta da l’Auropa è u Mediterràniu, è quist’annu serà u Portugalu. Scambii è spartere, a fiera di Bucugnà hà fattu maravigliosamente avanzà a prufessione, ma dinù tutte e pruduzzione è l’ecunumìa nustrale. Hè a prima fiera di Corsica ! Ùn ci mancate !
Pudete truvà u prugramma nant’à a pàgina Facebook di l’associu Foyer rural U Castagnu. •
