Si ne sò andati inseme, u 2 di ghjennaghju 2018, Francescu Saveriu Orsini à l’età di 72 anni, è u so fratellu Filippu Maria Orsini, à l’età di 69 anni.
Èranu sempre inseme, sempre à fiancu à noi, dapoi tant’anni, marchjàvanu l’unu accant’à l’altru, inseparèvuli, u surisu in bocca, a cunfidenza in core, l’incuragime in e so parulle, ci purtàvanu da a so fede. Militenti di prima trinca, di u Tarranu d’Alisgiani, anu campatu a maravigliosa gioia di a vittoria cù noi u 10 di dicembre scorsu.
Quant’elli èranu beati !
U ghjornu stessu di u principiu di a nova Cullettività, si ne sò andati, sapendu bè ch’elli pudìanu parte cheti è sereni. Un doppiu dolu tremendu pè i soi, figlioli, figliulini, nipoti, niputini, tutti i parenti è l’amichi.
Dulurosa nutizia.
S’assumigliàvanu cum’è picci, campàvanu cum’è picci, è si ne sò andati l’unu à pressu à l’altru, cum’è picci, dice u figliolu di Filippu, Ghjuvan’Petru Orsini. Arritti manda cundugleanze afflitte è fraterne à tutti i soi, parenti è amichi. Ripusate in pace o fratelli di lotta, sapemu ch’elli ci sò oghje duie stelle in più ad accumpagnacci per scrive u nostru avvene.
