Segolène Royal hà annunziatu a settimana scorsa ch’ella avìa lanciatu a cunsultazione per sceglie u candidatu chì sarà in càrica di l’infrastrutura di u gazu pè a nostra alimentazione energètica.
A nutizia ùn hà avutu tantu ribombu ind’è a stampa è ghjè un peccatu pè u pùblicu, chì l’infurmazione hè impurtante. Vale à dì chì simu in traccia di girà in veru a pàgina di u fiulu pisìu in Corsica. Ci volerà torna à scumbatte è stà attenti à ciò ch’ellu avvanzi u cartulare, ma a strada hè stata pigliata è simu nant’à a vìa di a transizione energetica. Ghjè un prò pè a nostra ìsula. Un prò pè a salute di a ghjente, di l’animali, di l’ambiente. U fiulu porghje pulluzione per l’aria è pè a natura. Pruvucheghja càncari è malatìe rispiratorie. Hè perìculu dinù per vìa di u rìsicu di splusione in casu d’incèndiu di e riserve di fiulu allucatu. Dopu à tante è tante lotte dapoi 40 anni, hè irrispunsabilità di pruvà à facci rinculà oghje, solu per avè qualcosa di sfarente da dì. U gazu hè necessariu per francà a tappa trà u fiulu pisìu oghje, è l’energìe rinuvelèvule generalizate dumane. Hè impussìbile à passà di l’unu à l’altre in quatru è quatru ottu. Tuttu u mondu a sà. Rimette in càusa oghje u gazu, hè vulè allungà a stòria di u fiulu pùzzicu, rispunsèvule di numerosi impiastri. U monossidiu di carboniu entre in u sangue, affoca l’ossigene pruduttu da l’urganìsimu. Hè un perìculu per tutti ma pè u più pè e parsoni chì sòffrenu di malatìe cardiuvasculare. U diossidiu di zolfu porghje pattulugìe rispiratorie grave, strughje e difese pulmunare è impeghjurisce e malatìe cardiuvasculare è rispiratorie.
L’ossidiu d’azotu infiamma u funziunamentu di i pulmoni, pè u più pè i zitelli è e parsoni indebbulite.
I pulluanti urgànichi pesistanti anu effetti tòssichi anch’elli nant’à a salute di a ghjente è di l’animali.
Disprèzzanu u sistema immunitariu, tòccanu à u sistema di a ripruduzione è anu prupietà cancarogene.
Pruvuchèghjanu effetti ancu cù pìccule quantità è cum’elli s’accumulèghjanu, anu effetti à longu andà assai gattivi chì ponu cambià i geni è porghje càncari. Ci sò dinù e particelle, chì sò resti di cumbustione invisìbile. Più sò chjuche è fine, più sò periculose. Suspese ind’è l’aria, rispirate da a ghjente, si fìccanu ind’i pulmoni è viàghjanu sin’à u sangue. Pòrghjenu malatìe cardiuvasculare, infarctus, accidenti vasculari cerebrali, morte. I stùdii medicali palèsanu chì più aumèntanu e particelle fine ind’è l’aria, più aumenta a murtalità. E parsoni anziane è i cinnici sò i più tocchi, cù e parsoni chì sòffrenu di pattulugìe pulmunare, àsima è difficultà rispiratorie.
I cumposti urgànichi vulatili infine sò gravamenti tòssichi anch’elli pè e cèllule sanguine è l’urgani chì e prudùcenu cum’è u merollu di l’osse. È torna Vignale, u risultatu sò càncari, leucemìe è pattulugie rispiratorie da tutte e mamme ! U fiulu pùzzicu hè stata una scelta irrispunsèvule ch’hà incausatu a morte di centinaie di ghjente di sicuru. Avà, fèmula finita !
Fabiana Giovannini.
