A Squadra Corsa hè nata qualchi annu fà da a vuluntà di mustrà chì a Corsica sapìa ghjucà à u pallò à i più alti livelli. Adunisce nant’à un sìntimu d’appartenanza è di difesa di a so identità cù u futbollu, tutti i ghjucadori corsi chì ghjòcanu à u livellu lucale, naziunale o internaziunale. È ghjucatori di talente pò ci n’hè ! Ancu puru sè oghje sò e nove generazioni chì pìglianu a rileva. Vale à dì chì s’elli sò partuti uni pochi di ghjucatori maiò cum’è Yannick Cahuzac, Yohan Cavalli, Gary Coulibaly, Gilles Cioni… ghjòvani ghjucatori ghjùnghjenu à rimpiazzali cum’è i Roncaglia, Tomi, Santelli, Maggiotti, i fratelli Tramoni, senza cuntà chì fèrmanu ghjucatori sperimentati cum’è Rémy Cabella, Yohan Bocognano, Dumè Guidi, Christophe Vincent, è tant’altri !*
Dopu à un arrestu impostu da a pandemìa è un bisognu di ristrutturazione, a nostra squadra naziunale hà ripigliatu a strada di i terreni di futbollu. U 10 di ghjugnu scorsu, affruntava A Naziunali Siciliana in Caltanissetta in Sicilia. A squadra di a regione autònoma di Sicilia era un avversariu di livellu chì ghjoca in a Conifa, a federazione internaziunale di ghjocu à pallò di e nazioni senza statu : « Alla base dell’idea di costituire la Nazionale di calcio della Sicilia c’è la consapevolezza che l’isola, benché giuridicamente legata alla Repubblica Italiana in qualità di regione autonoma, rappresenti un’entità geopolitica, storica, linguistica e culturale dotata di una sua particolare e distinta identità. In sintesi una “Nazione senza Stato” » spiècanu i risupunsèvuli di a Naziunali Siciliana. « Siamo convinti che uno spettacolo popolare e aggregativo come il calcio possa essere, anche attraverso l’adozione di una specifica simbologia, vettore di riflessione culturale, conoscenza storica e valorizzazione del patrimonio linguistico siciliano. Riconoscendo il grande potenziale dello sport quale fenomeno in grado di suscitare senso di appartenenza e fierezza per le proprie radici, la Nazionale di calcio della Sicilia vuole contribuire a rafforzare il legame tra questa antica isola ed il suo popolo. E di questo popolo riteniamo che facciano parte anche i milioni di cittadini di origine siciliana sparsi in giro per il mondo, dagli Stati Uniti all’America Latina, dall’Europa all’Australia. Attraverso la Nazionale di calcio della Sicilia vogliamo promuovere la valorizzazione dell’identità e dell’immagine della nostra isola a vantaggio dei suoi abitanti e del mondo » si po leghje torna nant’à u so situ internet.
« Una terra, un pòpulu, un’Avvene » hè stampatu nant’à u logo di a Squadra Corsa chì raprisenta a prima bandera, quella di i naziunali di u diciottèsimu sott’à a cundutta di Pasquale Paoli.
A Squadra Corsa brama anch’ella cù u futbollu è valori forti d’identità di raprisentà di a più bella manera pussìbule a Corsica aldilà di e fruntiere ! « Vulemu una ricuniscenza cum’è a Martinica, a Reunione, a Guyane » dice u so presidente Dédé Di Scala, « pensemu chè no simu oghje a sola regione di Francia à avè a capacità di fà una squadra naziunale. Ancu sè no ùn sunniemu micca à a grande sera, vulemu solu ghjucà à tutti i livelli ».
A Squadra corsa hà rinuvellatu a so struttura cù a partenza di Yohan Cavalli, attuale intrenore di u Niger, ghjè Yannick Cahuzac chì diventa coach di a maglietta nera è bianca, cù Gary Coulibaly intrenore aghjuntu.
Aldilà di u terrenu, ssu gèneru di scontru permette dinù di « creà ligami culturali è ecunòmichi trà e duie ìsule ». A squadra hè partuta durante cinque ghjorni à scopre a Sicilia è ci era a pussibilità dinù pè i sustenitori d’accumpagnali.
Parte di u futbollu, hè statu un bellu macciu assai disputatu, è a nostra squadra averìa meritatu omancu una parità, vistu l’ingaggiamentu è u talente di i soi. Hè a Naziunali Siciliana ch’hà vintu 1 à 0 nant’à u so terrenu di u stadiu Marco Tomaselli. « Un pocu di frustrazione quantunque… anu marcatu in u so mumentu forte è noi ùn ci simu ghjunti, peccatu sò delusu pè i ghjucatori, meritàvanu di più » hà dettu u coach Cahuzac, veru cumpetitore.
Simu sicuri ch’elli piglieranu a so rinvìncita chì l’invitu hè già statu lampatu per un macciu ritornu in Corsica ! Forza Corsica ! Forza u ghjocu à pallò ! Forza a fratellanza trà e nostre nazioni ! •
F.G.
* U staff : Yannick Cahuzac, Anthony Lippini, Gary Coulibaly, Hervé Sekli.
* A squadra : Ghjuvanni Quilicchini, Sacha Contena (guardiani), Adrien Pianelli, Yohan Bocognano, Dumè Guidi, Adrien Cinquini (difensori) Anthony Roncaglia, Yanis Cimignani, Julien Maggiotti, Julien Benhaim, Julien Anziani, Thomas Berenguier, Jean-François Grimaldi, Christophe Vincent, Thibault Campanini (meziterrenu), Rémy Cabella, Alexandre Cropanese, Matteo Tramoni, Lisandru Tramoni, Félix Tomi, Benjamin Santelli, Christopher Ibayi, Jérémy Santini (attaccanti).
