E cròniche di a stampa radiufònica sò limitate à qualchi minuta pruvendu à riassume un edea, un evenimentu, un fattu… Suvente di manera stuzzicaghjola, ma ponu ancu burlà a ghjente. Perchè caricaturendu, si pò fà disguasti ind’è l’opinione pùblica nant’à l’imàgina di stu fattu, d’una persona, o d’un pòpulu.
RTL ripigliava pocu fà un inchiesta di u ghjurnale Le Point per tiranne una crònaca intitulata « Crisa ind’è a Funzione pùblica : l’eccezzione corsa ! » A ghjurnalista diciulava nant’à a crisa di e vucazione ind’è a Funzione pùblica in Francia… « Atroce !… più nimu ùn vole diventà funziunariu ! Da quì à 2030 duverìanu mancà 400.000 funziunarii, vale à dì 7 % di l’impiecu pùblicu »… « dapertuttu hè a crisa. Tutta a Galla sarebbe minacciata » scherzava torna a ghjurnalista Isabelle Saporta, « tutta ? Innò, perch’è un Isula di bellezza pupulata d’irriduttìbili Corsi resiste sempre à u disamore chì tocca l’impiecu pùblicu ». È di precisà chì dopu à i territorii di l’Oltremare, a Corsica hè a regione a più amministrata di Francia :
« Conta 80 agenti per 1000 abitanti per una mezana naziunale di 73. »
Aghjustendu : « à u senu di a Cullettività territuriale corsa, tucchemu a cima cù 36 agenti territuriali per 1000 abitanti quandu u restu di a Francia ne conta 26 ».
« Sapete quantu candidature hà ricevutu a Cullettività corsa quand’ella hà lanciatu in 2023 una campagna di ricrutamentu per solu 30 posti di silvagnoli, agenti di spluttazione di u retale stradale è prutezzione di l’ambiente ? » puttachja torna a ghjurnalista cuntenta cum’un pichju… « 1000 per 30 posti ! », stumachèndusi torna : i funziunarii sò 28 % di l’impiechi ind’è l’ìsula : « è dopu què, certi spìriti pienghjimoglia puderanu torna dubbità di l’affezzione di i Corsi pè u Statu francese ! S’ellu ùn hè micca una dichjarazione d’amore à a Francia, cosa hè ? »
« Site un pocu scherzosa, a Corsica hè una di e regioni induve i rivenuti sò frà i più dèbbuli di Francia. Forse hè per quessa chì i Corsi si vòltanu versu l’impiecu pùblicu ? » li dice u s’amicu ghjurnalistu scaccanendu à l’insottu anch’ellu… È Isabelle Saporta di risponde : « avete a raggiò, conta, ma s’omu laca d’accantu u nostru sèriu, ghjè assai sbillicante » palesa a ghjurnalista : « sò i più autonomisti di tutti i nostri regiunalisti chì sunnièghjanu di raprisentà a grandezza di a Francia diventendu funziunariu ! »
Umbeh… di sicuru, face ride à quelli ch’anu u laziu di ride, ma a caricatura si scorda quantunque di custati evidenti. Digià, ss’autunumisti, o naziunalisti, face 60 anni ch’elli dinùnzianu l’andature culuniale ch’anu cundannatu millaie di Corsi à spatriassi per truvà un impiecu ind’è a Funzione pùblica, lagnèndusi d’un ecunumìa squilibrata, cù una agricultura arruinata da un sèculu di lege duganera, una cuntinuità territuriale ch’affucava i pruduttori isulani, d’indùstria pocu è micca, senza parlà di u scempiu culturale ! Què ghjè pè u passatu è si puderìa scrive pàgine sane di cum’ella s’hè scritta da Parigi sta dipendenza corsa…
In quantu à oghje, un ìsula muntagna forse ùn si rege micca cum’è i centri urbani francesi. Què, ghjè pè a Funzione pùblica. È per l’impiechi pùblichi territuriali, nunda à chì vede ghjust’à puntu cù u Statu, forse a spiecazione di ssi 10 agenti in più si trova ind’è e cumpetenze in più. Nò ? Ùn ci serà micca una gattiva lingua à RTL per diciulà nant’à i 50 % di i funziunarii francesi impiecati in a sola Ile-de-France ? •
