Luni u 13 d’ottobre 2025, a procura di Tarascon hà classificatu senza sèguita l’inchiesta preliminaria aperta in 2023 à a dumanda di i deputati corsi Ghjuvan’Felice Acquaviva è Laurenzu Marcangeli in l’affare di l’assassìniu d’Yvan Colonna. Di chè rinvivisce e tensioni in carrughju, è pruvucà a còllera di a giuventù corsa. U procuratore di a Repùblica dice avè cunduttu « un inchiesta apprufundita » è stimatu chì « l’elementi nant’à i quali s’appughjava a lagnanza nant’à pussìbuli disfunziunamenti ùn èranu accertati ». « Ùn ci hè micca infrazzione » parte di l’amministrazione penitenziaria secondu stu procuratore…
Ammentemu quantunque ciò ch’era rimpruveratu. I dui deputati avìanu scrittu à a procura di Tarascon per vìa di a suppressione d’infurmazioni infurmàtiche ind’è u prugramma Genesis chì ghjove à rinsignà tuttu ciò chì si passa in a vita d’un incarceratu. Durante l’inchiesta parlementaria cundutta da i dui deputati, una survegliante di a priggiò d’Arles avìa palisatu un cambiamentu d’attitùdine di Franck Elong Abé à parechje volte nanzu à l’agressione. L’avìa intesu dì « l’aghju da tumbà » parlendu di Yvan Colonna. Ma, di manera strana, e rimarche ch’èranu state purtate nant’à u prugramma Genesis avìanu sparitu. « I disfunziunamenti ùn sò micca accertati », dice u procuratore…
Ammentemu torna, chì a rispunsabilità di u Statu ind’è l’assassinatu hè stata ricunnisciuta da u Tribunale amministrativu di Marseglia chì perciò hà indennizatu a famiglia. « Disfunziunamenti maiò » dice u Tribunale, « mancamenti culpèvuli », « mancanza di surveglianza », « mancanza d’iscrizzione in quartieru d’evaluazione di a radicalisazione »… Pè u Tribunale, « u Statu ingagia a so rispunsabilità », pè u più « nant’à u fattu di mancamenti di l’amministrazione à a so ubligazione legale di surveglianza è di u rispettu di a securità di l’incarcerati ».
Ammentemu dinù e revelazioni di u raportu d’inchiesta parlementaria : a persunnalità di l’assassìniu, a so libertà d’azzione in priggiò, allora ch’ellu era ricunnisciutu cum’è periculosu, vistu a so andatura « in cima di u spettru » di u terrurìsimu islamistu è vistu e numarose agressioni cummesse à longu à u so parcorsu carcerale, contr’à d’altri prigiuneri o contr’à surveglianti. Ammentemu e bucìe è i fatti piatti da a direttrice di a priggiò. Ammentemu, u ghjornu stessu di l’aggressione, a sparizione di u survegliante. Sempre ancu oghje ùn si sà micca induv’ellu hè andatu quellu ghjornu, lachendu i dui prigiuneri senza surveglianza. Ammentemu chì sti dui prigiuneri, cunsiderati cum’è « particularmente signalati » ùn duvìanu mai scuntrassi, è ancu di menu stà soli ind’una sala. Eppuru, Elong Abé hà avutu più di 9 minute per attaccà Yvan Colonna è affucalu. Ammentemu i disfunziunamenti di u sistema di video surveglianza, è u fattu chì l’agenti incaricati di u dispusitivu ùn sapìanu ghjòvesine. Ammentemu torna e rispunsabilità pulìtiche : sè Yvan era statu avvicinatu in Corsica cum’ella dumandava a lege, sarebbe sempre in vita oghje. Ammentemu i prupòsiti trà prefetti chì sò stati palisati torna di pettu à a Cummissione d’inchiesta parlementaria. Si rallegràvanu di l’assassìniu d’Yvan… U ghjocu tòrbidu di a prefetturale, u ghjocu tòrbidu di u rinsignamentu penitenziariu è di manera generale di « a cumunità di u rinsignamentu » in Francia, u ghjocu tòrbidu di a procura antiterrurista, u ghjocu tòrbidu di l’amministrazione penitenziaria, ùn màncanu i scàndali ind’è u cartulare di l’assassinatu d’Yvan Colonna. Ma… dice u procuratore di Tarascon : « ùn ci hè micca infrazzione »…
Ùn sò compie tutte l’azzioni ghjudiziarie ancu assai. Cuntinuemu a lotta pè a Ghjustizia è pè a Verità. •
