« Global Sumud Flotilla », vale à dì flotta mundiale resistente per Gazà, hè u più grande cunvogliu umanitariu marìttimu di a stòria. Hè un iniziativa citatina nata di lugliu 2025 da umanitarii, artisiti, duttori, militenti, rispunsèvuli pulìtichi, associi è urganisazioni da tutte e mamme, chì si sò mossi in una cinquantina di paesi. Sò millaie di personi à avè appruntatu st’azzione, 500 omancu à imbarcassi in una sessantina di battelli. Raghjùnghjenu altre mosse cum’è a Flottiglia di a libertà o torna a Marchja mundiale versu Gazà. U scopu hè di mandà à tempu tutti ssi battelli, cù persunalità à bordu, per sciappà u blocchime ind’è l’incastru palestinianu. Sè i battelli di a Flottiglia di a libertà èranu troppu isulati di maghju scorsu, a Global Sumud Flotilla brama di pudè impònesi è francà i tràmpali di l’armata israeliana, per porghje aiutu à a ghjente chì patte a fame. L’azzione si vole senza viulenza è determinata per dinunzià è rompe u blucchime, purta un aiutu umanitariu è apre un curridore marìttimu citatinu versu Gazà. U mottu di a dimarchja hè : « Quandu u mondu stà silenziosu, alzemu e vele ».
Frà e più cunnisciute di e persunalità imbarcate, ci hè Greta Thunberg, a militente ecolugista svedesa, Mandla Mandela, figliulinu di Nelson Mandela, Ada Colau, anziana merre di Barcelona, Bruno Gilga, militente bresilianu di u Muvimentu Revuluziunariu di i Travagliatori, dinù attori, eletti, rispunsèvuli pulìtichi, ghjurnalisti, umanitarii. Pè a delegazione francese per un dettu, l’atrice à parechji Oscar, Adèle Haenel, è deputati di LFI cum’è Emma Fourreau, Thomas Portes, Marie Mesmeur, piglieranu u mare anch’elli. Partendu u 31 d’aostu, di Barcelona, i Baleari, a Sardegna, parechji battelli sò già ghjunti in Tunisìa. D’altri dèvenu raghjùnghjeli vinendu di Marseglia, Gènova, Catane… o Aiacciu ! S’imbarcheranu ver di a banda di Gazà ch’elli tuccheranu dopu à 15 ghjorni di mare, per porghje acqua, nutrimenti, medicamenti. U guvernu israelianu hà minacciatu di trattali cum’è terruristi. Global Sumud Flotilla s’hè appruntatu, furmendu a ghjente à bordu da sapè riagisce di fronte à l’armata israeliana, ghjuristi travàglianu à truvà e pussibilità di parala, à traversu prutezzione diplomàtiche per un dettu.
In Corsica dinù citatini si sò mossi, appruntendu battelli ch’anu da parte ssi pròssimi ghjorni. À bordu, Isalina Amalric-Choury, figliola di u resistente Maurice Choury è nipota di a resistente Danielle Casanova, morta in u campu d’Auschwitz Birkenau di maghju 1943. « Vistu u mo parcorsu, a mo làscita familiale, u mo ADN di fatti, ùn pudìa ch’andà à luttà per difende i dritti umani. L’aghju fatta tutta a mo vita, ind’è a mo lotta contr’à l’antisemittìsimu dopu guerra, dapoi dui anni senza sfiatà per partecipà à l’azzioni di u cullettivu per una pace ghjusta è durèvule in l’oriente vicinu » dice Isalina Amalric-Choury chì chjama u presidente di a repùblica à prutege diplumaticamente a Global Sumud Flotilla, cù sanzioni per un dettu contr’à u Statu israelianu.
Parechji guverni, urganisazioni, partiti pulìtichi, associ da tutte e mamme sustènenu l’iniziativa Global Sumud Flotilla. Dice l’associu Medichi Senza Fruntiera : « Di pettu à l’inazzione è u mancu di vulintà di i guverni di fà piantà u genocidiu in Gazà, MSF sustene a Global Sumud Flotilla in a so traversata per rompe u blocchime israelianu è alertà nant’à a sorte di i gazauì ».
U 22 d’aostu scorsu, l’ONU hà ufficialmente dichjaratu a famina in Gazà induve omancu 500.000 personi sò ind’una situazione catastrofica. L’urgenza ci hè. •
