Hè esciutu sti pochi mesi, un libru chì ci mancava fin’ora. Si tratta d’una publicazione chì ripiglia e grande date di a nostra stòria, fendu di stu ducumentu un’òpara ùtule assai s’è nò vulemu chì u pòpulu corsu t’appia una stòria cumuna. Si sà chì, accant’à a lingua, à i Corsi di sangue è à quelli di core, à a tarra, à a cultura, ecc., un pòpulu s’hà da ricunnosce dinù à a so stòria spùtica.
Issu libru ùn rimpiazza micca un manuale stòricu. Quì, ùn truvarete micca anàlisi di u passatu di a Còrsica ; innò. U fattu si stà chì sò ammintate quì certe date fundamentale di a stòria corsa.
A classìfica, si capisce, seguita a crunulugia. Da l’omi di Neanderthal ver’di 70,000 nanz’à Cristu sin’à a vittoria di i naziunalisti à l’elezzione di 2015, scupreremu l’Antichità, u Medievu, l’èpica muderna, quella oghjinca, u XIXu sèculu è i XXu-XXIu sèculi. Long’à u libru, sò inquadrature chì danu infurmazione precise di più annant’à un fattu impurtantìssimu di l’èpica. Possu per un dettu piglià quì l’esempiu di l’èpica muderna : accant’à i stalvatoghji chì sò successi trà 1569 è 1592, truvemu un’evucazione sviluppata di a morte di Alexandre Sauli l’11 d’ottobre di u 1592. Ma per ciò chì tocca à u XIXu sèculu, sò trè inquadrature senza a lista cronològica (pàgine 112 è 113) : a morte di u Cardinale Fesch, a vìsita di Prosper Mérimée in Còrsica è a piazza di a futugrafia in l’ìsula ind’u 1840. À l’arringuerciatu, pè i XXu è XXIu sèculi, trà 1963 è 2015, (pàgine 136 à 146), ùn ci hè inquadrature, soca perchè chì u tempu chì passa pò solu fà a sfarenza trà ciò ch’impreme è ciò chì hè menu impurtante.
Una crìtica quantunque : ùn tocca micca u cuntenutu ma a forma : l’inquatrature cù i so ritratti sò in un speziu di rossu chì rende a lettura diffìciule di più. D’altronde, ci sò i tìtuli.
Ogni parte t’hà un tìtulu chjaru (Moyen Âge pàgina 23 hè più grande hè occupa una pàgina sana, cù un riassuntu di ciò chì hà da seguità).
Ma nentr’à un’èpica, si vede pocu è micca i sottutìtuli : sò fasciati d’un rossu chì sguassa u testu scrittu in biancu. Pàgina 30, qual’hè chì pò leghje La Corse pisane ; pàgina 62, listessu prublema cù Révolte des trois pievi ? Si pudia dinù aghjunghje una frisa cronològica cù ciò chì si passa in Còrsica è ciò chì si passa attempu ind’u restu di l’Auropa, da fà u paragone.
Eccu dunque un libru impurtante pè a cunniscenza chè no avemu di a nostra a stòria, malgratu una messa in pàgine goffa goffa.
Marina Chovin.
