Aghjurìa d’Hyperloop ricumpensava ghjovi i sò premiati…
Hyperloop hè un prugettu industriale iniziatu da u milliardariu Elon Musk ch’hà fundatu e startup PayPal, Space X, Tesla… U scopu hè di sviluppà un mezu di trasportu pè i passageri è pè e marcanzìe più ràpidu chì ciò ch’esiste oghje (più ràpidu… è à tempu sicurizatu).
U cuncettu arriposa nant’à capsule chì viàghjanu à vitezze tremende nentru una spezia di tubu cù basse pressione. U fenòmenu hè ecunòmicu in energìa, dunque pocu caru pè u passageru… Umbeh! Avemu tutti suniatu un ghjornu rèndesi trà Aiacciu è Bastia in qualchi minuta pè u prezzu d’un tichettu di metrò! Cù Hyperloop avemu da rivuluziunà i mezi di trasportu oghjincu!
Di maghju 2016, a sucietà americana Hyperloop One hà lampatu una chjama à prugettu mundiale per identificà i territorii interessante pè u so prottottipu… U scopu ùn hè solu di selezziunà e cunnezzione e più interessante… ma dinù e sfide e più belle per ssu mezu di trasportu! 2600 candidature sò state poste in 100 paesi à traversu u mondu…
È tandu, ci sò stati dui ghjuvanotti abbastanza visiunarii per imaginà chì a Corsica è a Sardegna pudìanu treminduie esse leate da quella scumessa ! Ghjuvan’Carlu Simeoni è Petru Ghjàcumu Patrizi di l’impresa Femu Quì SA sò andati à vede à Cullettività Territuriale di Corsica è a Giunta autònoma di Sardegna per cunvìncele di ssu prugettu un pocu scemu. Eccu cum’ella principia l’avventura ! L’Agenzia per l’Acconciu durèvule, l’Urbanìsimu è l’Energìa di a Corsica (AUE) hà rilevatu a scumessa pè a CTC cù l’aiutu di l’Uffiziu di i Trasporti. Barbara Susini per l’AUE hà messu manu in pasta è ghjè cusì, cù ssu travagliu cumunu, chì l’edea hà presu forma pè a Corsica è a Sardegna. A sfida di mette una lea trà e duie ìsule hè interessante per Hyperloop One. Hè cusì chì, frà e 2600 candidature, a Corsica è a Sardegna fèrmanu frà i 35 territorii selezziunati pè a finale! 450 chilòmetri parcorsi in 30 minuti, frà i quali 12 chilòmetri di mare trà e Bocche di Bonifaziu! Una lea trà quattru porti, quattru aeroporti, sette stazioni, 20 cità, 13 uspidali cunnettati è un campus di trè università, vale à dì 45.000 studienti ! U rolu di l’AUE hè statu di riflette à una dimarchja integrata cù tutte e prublemàtiche d’urbanìsimu è d’energìa in core di l’inghjochi di i trasporti muderni. Hà vulsutu interessà a ghjuventù à ssu prugettu futuristu lampendu un cuncorsu d’edee internaziunale, apertu à i studienti è i ghjòvani attivi da imaginà e trasfurmazioni di e cità, i territorii, e manere di campà, l’imprese, a cultura, l’educazione, a salute… avvicinà cusì e duie ìsule serà in tutti sti duminii è torna d’altri una vera rivuluzione! Ghjovi, faremu cunnosce u vincitore di ssu cuncorsu. Serà ellu invitatu u 7 di ghjugnu pròssimu pè u showcase d’Hyperloop One in Amsterdam! Chì bella avventura per ssu ghjòvanu!
Ùn ridite micca… tuttu què ùn hè micca utopìa, Hyperloop One hà fattu e so prime prove in u Disertu di u Nevada, nant’à una distanza di 500 metri, u sistema di prupulsione ha fattu impressione… E capsule d’Hyperloop ponu viaghjà sin’à 1200 chilòmetri à l’ora. Vale à dì francà i Stati Uniti in largore in 4 ore! Pè i Corsi è i Sardi, vale à dì ch’ellu si metterà Bastia à una mezoretta di Càgliari ! Chjìbba !
Fabiana Giovannini.
