Ind’un ìsula chì conta 18,3 % di ghjente sott’à u livellu di puvertà (14,4 % in Francia) è 15.000 zitelli chì pàtenu a fame… disgraziosamente, I Restò di u Core anu di chè fà ! Di tutte e regioni in Francia, a nostra ìsula hè a più tocca da a puvertà, cù i rivenuti i più bassi è i prezzi i più alti…
Fundati da l’umorista Coluche in u 1985, Les Restos du Cœur hè un associu d’utilità pùblica ch’hà per scopu di sustene i disgraziati cù ripasti gràtisi è prudutti di prima necessità. L’associu oghje partecipeghja in più à l’inserzione suciale è ecunòmica di sta ghjentarella. In grazia à i restò, si pò fà u giardinu, imparà l’infurmàtica, parte in vacanza, truvà spazii d’accolta, di cunsigli, d’aiutu pè i zitelli per un dettu, per amparà à cucinà o per rege u purtamunetu, per circa dinù un impiecu, una furmazione, un alloghju, per avè accessu à i dritti suciali, di ghjustizia o di salute, per amparà dinù à parlà megliu u francese, per avè accessu à a cultura, eccètera. I restò sò un aiutu preziosu pè u cutidianu di monda ghjente. Per l’inguernu 2023-2024, sò 163 millioni di ripasti chì sò stati distribuiti è 1,3 millione di ghjente accolta. Sò 9 millioni e personi in situazione di precarità. Hè u più altu livellu toccu dapoi a creazione di i restò…
Les Restos du Cœur sò 11 delegazioni regiunale, 112 associ dipartimentali, 2348 spazii di sulidarità è centri d’attività, millaie di benvulenti.
L’aiutu vene di a ghjente pè a ghjente, vale à dì 80 % sò doni, 15 % suvvenzioni, è pè u restu i soldi vènenu da l’imprese è u mecenatu. Eppò dinù, ci sò Les Enfoirés è u so cuncertu annuale maiò cù a mubilisazione di monda artisti.
In Corsica, esìstenu parechje antenne di i Restò di u Core, in Bastia, Aiacciu, Portivechju, Prupià, Calvi, Corti, Ghisunaccia, Santa Lucia di Moriani… Annu, sò quasi 34.000 ripasti chì sò stati distribuiti in Pumonte. I restò dìcenu a crèscita di a puvertà in Corsica : trà 2022 è 2023, i bisogni sò cresciuti di 10 %. L’associu riceve a robba da u Cuntinente, ma compra dinù soprapiazza… è « crescenu i prezzi ! » dice Isabelle Torre, a presidente di u Pumonte. Ancu assai, a campagna di doni hà racoltu una decina di tunnellate di prudutti in i magazini pè u Pumonte, è 8700 tunnellate in Cismonte, presidatu da Francesca Colomb-Luciani.
Eppò, dapoi dui anni, a Truppa di i Restò adunisce mond’artisti à u Palatinu per un grande cuncertu in Corsica dinù. In u 2023, hà racoltu 105.000 àuri ! A seconda edizione hè stata più mudesta, ma hà racoltu quantunque 80.000 àuri !
A famosa canzone di i Restò, scritta da Jean Jacques Goldman, hè stata tradutta da Ghjuvanni Chiorboli è anch’ella si sparghje ind’è l’ìsula è dice chì i Corsi ùn màncanu di generosità :
Oghje nò, ùn si pò stà bè, sì tutt’ognunu pens’à sè
Fame è fretu ùn s’hà più d’avè, eu pensu à tè, tù pensi à mè
Un serà sempre trallallà, solu da beie è da manghjà
Un po’ di pane è di calore, à l’usteria, quella di u core
Fame è fretu ùn s’hà più d’avè, eu pensu à tè, tù pensi à mè… •
