930 ghjorni di blocchime di Gazà. L’Associu di a stampa internaziunale hà publicatu stu 30 d’aprile una lèttera zifrata da più di 30 mèdia per mughjà : « Lasciàteci entre in Gazà ». Andà sopralocu, parlà à i civili, ripurtà ciò ch’elli càmpanu hè u fondu essenziale di u travagliu di a stampa. L’azzione hè suvente impedita, ma cum’è in Gazà ùn s’era mai vistu dìcenu i ghjurnalisti. L’Ucràinia, l’Irak, a Sirìa sò lochi diffìciuli ma a stampa rièsce quantuque à travaglià. Invece, dapoi u 7 d’ottobre di u 2023, a stampa straniera ùn pò entre in Gazà.
211 personi di a vintina di battelli di a flotta per Gazà sò stati arrestati in mare. Secondu à i manifestanti di a flottiglia, èranu in a zona internaziunale è sò militari armati chì si sò presentati cum’è « Israele » è l’anu minacciati. À a dumanda d’Israele, a pulizza greca l’hà sbarcati stu primu di maghju è cundutti in terra, pò purtati in autocari sin’à u portu d’Atherinolakkos. L’Italia hà dumandatu a liberazione di i Taliani ritenuti. A Spagna, a Turchìa è u Pakistanu anu dinunziatu « a viulazione di u dirittu internaziunale ».
« Israele sprezza un antra volta u drittu internaziunale attachendu una flottiglia civile ind’è l’acque ch’ùn li appartènenu micca. L’Unione aurupea deve suspende in fùria l’accordu d’assuciazione è esige chì Netanyahou rispetti u drittu marìttimu » hà dettu u primu ministru spagnolu, Pedro Sanchez.
Hè a seconda prova di flotta mandata in sustegnu à Gazà chì fiasca.
1.800 donne vìttime di viulenze cunghjucale in Corsica in 2025 secondu i servizii di pulizza. Stu 29 d’aprile èranu inauguratu dui lochi dedicati, quartieru di u Fangu in Bastia, a Casa di e donne è l’Unità d’accolta pediatrica pè i zitelli in perìculu. St’arnesi purtati da u Centru uspitalieru di Bastia, permèttenu di migliurà a presa in càrica di e vìttime cù squadre pluridisciplinàrie (psicologhi, infirmieri, assistante suciale, mammane, pediatri, psichiatru…) « Quandu si vede ch’un zitellu hè vìttima tutte e dece minute di viulenze sessuale in Francia, chì una donna hè vìttima di viulenza tutte e duie minute, ci hè da pònesi e quistioni. Ma quì ssa casa hè digià una porta chì s’apre per dì à sse personi ùn sì micca sola, ci hè una strada, ci hè una pussibilità d’ascolta… di liberassi… ci hè una forza cullettiva di fà chì u to avvene ùn sia micca un avvene di paura è d’angoscia » hà dettu Ghjuvan’Francescu Bernardini ch’era u cumpare di st’iniziativa.
Centinaie di zitelli in Bravone, aduniti in sustegnu di u Cullettivu di e vìttime di a catastrofa di Furiani, in ricordu à quelli chì ci anu lasciatu a so vita o a so salute. Cù l’aiutu di a Lega Corsa di Futbol, anu girandulatu inseme nanzu di ritruvassi à u stadiu Santa Grimaldi per ramentà ssa zitella smarita in Furiani à l’età di 14 anni. Tutta a mezaghjurnata attelli di sensibilisazione anu permessu à i zitelli un spaziu per capisce, scambià è fà campà a memoria di a catastrofa.
Èranu dinù 200 cullegiani di tutta a Corsica, cù u sustegnu di u Retturatu, à scambià inseme è stà à sente prufessiunali, testimognii di u drama è membri di u Cullettivu.
Una fresca immensa vene dinù à accumpagnà ormai a stella di u ricordu. Rializata trà u Cullettivu, l’Associu Sporting Bastia 92, è u Sporting Club di Bastia, u prugettu a racoltu l’archivi da custruisce un veru locu di memoria à cantu à a stella, locu in più per tramandà a stòria è i valori novi chì dèvenu esse trasmesse à sse nove generazioni. •
