83 cumune di Corsica (contu arrestatu à a settimana scorsa) anu purtatu sustegnu à Scola Corsa, ch’ella sia cù una lèttera o cù una muzione vutata da u cunsigliu municipale. « Hè pròpiu di primura u so sustegnu. I ringraziemu ! » s’hè rallegratu u presidente di a Federazione di e scole assuciative d’insignamentu immersivu in lingua corsa. A chjama hè lampata. Site una cumuna ? Mandate u vostru sustegnu à Scola Corsa : https://www.scolacorsa.corsica/2026/05/01/note-a-lattention-des-maires-de-corse/
Site un elettu, o un amministratu ? Sullicitate a vostra cumuna da ch’ella porghji sustegnu ancu ella !
8.000 personi fìsiche o murale, anu purtatu sustegnu à Scola Corsa, zifrendu u so Manifestu. Attori di u mondu ecunòmicu, suciale, sindicale, culturale, stituziunale, o sèmplice citatinu… zifrate voi dinù è fate zifrà ssu manifestu : https://www.scolacorsa.corsica/signer/
I cinini di Scola Corsa sò in perìculu. Sè u Statu ùn tene micca e so prumesse di cuntrattualisazione generalizata è cuntinueghja e so attache contr’à e suvvenzioni di a Cullettività di Corsica per parà ssu mancu di cuntrattualisazione, Scola Corsa hè minacciata à cort’andà. È cù ella, i zitelli chì dapoi cinqu’anni impàranu a lingua corsa da pudè furmà una generazione d’omi è di donne bislingui. Purghjite u vostru sustegnu, Scola Corsa deve campà !
81 anni fà… l’Allemagna nasì capitulava dopu à sei anni d’una guerra tremenda per tutta l’Auropa è u mondu. Si parla trà 50 à 80 millioni di morti, secondu ch’omu conta tutte e vìttime di e cunsequenze di ssu martoriu ancu quelle dopu à a capitulazione.
È dì ch’ellu ci sò sempre ancu oghje ghjente per ludà u nazìsimu…
2.846 morti libanesi dapoi u principiu di a guerra trà Israele è u Hezbollah. È si conta dinù 8.693 feriti.
n 300 ghjorni è più ch’ellu hè imprigiunatu u ghjurnalista Christophe Gleizes in Algeria. Hè statu cundannatu à 7 anni di prigiò per « apologia di u terrorìsimu ». In fatti, per avè fattu un riportu nant’à a Giuventù Spurtiva di Kabilia, a squadra berbere di ghjocu à pallò. Vale à dì per avè fattu u so travagliu di ghjurnalista. Libertà per Christophe Gleizes ! •
