5 morti ind’un attacca di dronu rùssiu in Cernobile. Ma l’infurmazione dramàtica conta sopratuttu per raportu à l’agressione nant’à stallazioni nuclearie, quì un depòsitu di cumbustìbule radiuattivu frustu. Ancu assai d’appressu à l’ucràiniani u livellu addimessu di radioattività ùn hè statu francatu per via di l’intervenzioni rapida di i spendifochi ch’anu impeditu disguasti maiò… ma face parechje volte digià chì i Rùssii ghjòcanu cù u perìculu nucleariu…
1.000 chilòmetri. Hè ciò ch’anu parcorsu parechji droni ucrainiani per tuccà a Russìa in San Pettersburgu, cità nativa di Vladimir Poutine allora ch’ellu ci tenia u so Davos rùssiu di l’ecunumia.
L’Ucrainiani anu tuccatu a basa navale stratègica di Kronstadt, sìmbulu di a marina rùssia in a Baltica, un attacca à l’apertura di u cungressu, è una à a fine stu 6 di ghjugnu, fendu sente a minaccia nant’à tutti i partecipanti è inghjuliendu u capu di u Kremlin…
I droni di Kyiv anu toccu dinù un depòsitu petrulieru rùssiu à 500 chilòmetri di a fruntiera. Per l’armata ucrainiana hè una vera prudezza tecnulògica sott’à u nasu di a surveglianza aèrea rùssia.
« Hè tempu di finisce sta guerra » hà dettu Volodymyr Zelensky ch’hà lampatu parechje volte una chjama à neguzià. St’ùltimi mesi, l’armata ucrainiana hà ripresu 290 chilòmetri quadrati di territoriu à Moscù. Hà cumentatu u ministru di l’affari straniere spagnolu : « a Russia hè in traccia di perde sta guerra »…
I rùssii elli cuntinuèghjanu à bumbardà a pupulazione fendu sempre più morti è feriti nucenti…
1,2 millioni di fideli in Madrid stu 7 di ghjugnu pè a messa di u papa Leone XIV. Hè a più grande messa di u so pontificatu è un mondu impressiunante per sente una nova chjama à pace.
144 deputati contr’à 22 anu adduttatu in prima lettura a pruposta di lege per « prutege l’alimentazione di i francesi è e francese da e cuntaminazioni à u cadmium » ! Hè una bona nutizia pè a salute di a pupulazione ! A pruposta hè stata posta da i deputati eculugista Benoît Biteau è di manca Clémentine Autain. U scopu hè di parà a so utilisazione ind’è l’ingrassi fosfàtichi. A pruposta deve esse esaminata à u Senatu nanzu di pudè esse aduprata definitivamente. S’ellu ci sò amendimenti, ripasserà à l’assemblea naziunale.
215 meri è cunsiglii municipali, vale à dì i dui terzi di e cumune di Corsica anu deliberatu per porghje sustegnu à Scola Corsa fendu sapè a so vuluntà di dà i mezi à sse scole di spàrghjesi è di salvà a nostra lingua. D’altre cumune sò in attesa di a tenuta di u so pròssimu cunsigliu municipale pè aduttà anch’elle una muzione.
Fighjate a lista nant’à u situ è sustenite à Scola Corsa : https://www.scolacorsa.corsica •
