70.000 morti. Hè u prezzu à l’ora d’oghje di a guerra in Gazà, dice l’associu Médecins du Monde. 83 % di ssi morti sò civili, pè a maiò parte donne è zitelli. Si còntanu dinù più di 170.000 feriti, cù omancu 20.000 ch’anu bisognu d’esse presi in càrica in urgenza, dice torna l’associu. Quasi tutta a populazione hè stata spiazzata. « U sistema di salute hè statu messu à paghjolu, e strutture essenziale cum’è a pruduzione d’elettricità o a pruduzzione d’acqua putàbile sò state strutte. A situazione hè catastrofica » dice torna Médecins du Monde.
Secondu u ministeru di a salute in Gazà, sò morti dinù ind’è sta guerra più di 500 umanitarii (frà i quali 380 membri di l’ONU) è 269 ghjurnalisti. 700.000 zitelli sò privati di scola, è 320.000 pàtenu a fame. 92 % di e case è 96 % di e terre agrìcule sò state strutte.
17.199 àuri per assiste à un macciu di gruppu (vale à dì solu a prima parte di a cumpetizzione) à a cuppa di u mondu di futbolu ! Secondu a piattaforma SeatPick dice Capital, hè u bigliettu u più caru vendutu per avà in i macci di gruppi è ghjè per vede a Spagna contr’à l’Uruguay u 27 di ghjugnu. Per vede ghjucà a Francia contr’à u Senegal, ci vole à prevede per avà 4.683 àuri, è 5.767 àuri per vede u macciu contr’à a Norvegia. Ci hè una speculazione tremenda in a rivèndita di i biglietti. Quelli chì vèndenu, ponu vende à u prezzu ch’elli vòlenu. A Fifa tocca un percentuale di 15 %. In quantu à e rivèndite ch’ùn si fàcenu in u quadru di a Fifa, ùn ne parlemu mancu !
È pè a finale… u bigliettu u menu caru sarebbe (per avà) di 10.000 àuri. Digià certi biglietti si rivèndenu trà 16.000 à 24.000 dòllari dice Capital chì dice chì CNN informa ch’un bigliettu s’hè vendutu à 2,3 millioni di dòllari ! Pàrenu fole. Una vergogna.
7.000 pulizzeri, 6.000 gendarmi, 460 motociclisti per accumpagnà e delegazioni è 200 altri pulizzeri pè a guardia avvicinata di i capi di Stati, sò mubilizati pè u G7 in Evian. Ci serà più pulizzeri chè abitanti in a cità. U G7 adunisce e sette putenze ecunòmiche mundiale, Allemagna, Canadà, Stati Uniti, Francia, Italia, Giappone, Reame Unitu.S’adunìscenu ogni annu per truvà suluzioni in tèrmine di pace, di securità, di prusperità ecunòmica, d’inghjochi ambientale… in fatti, si discuta pè u più di l’interessi di i putenti di a pianetta…
15.000 àuri sò stati racolti stu 13 di ghjugnu in Corti à u prufittu di a Marie Do chì lotta à u latu di e famiglie tocche da un càncaru. Era u 20èsimu anniversariu di l’associu sta dumenicata ch’urganizeghja tutti l’anni una marchja è parechje manifestazioni in Corsica per racoglie soldi. L’associu hè statu creatu in u 2007 in memoria d’un impiecata d’Air Corsica, Maria Dumènica Versini, morta à 35 anni da sta malatitaccia. Dapoi tandu l’associu porghje sustegnu à i malati è e so famiglie di fronte à u càncaru. La Marie Do hà cum’è cumpare è cummare Patrick Fiori è Jenifer.
Per infurmavi è sustene l’associu : www.association-la-marie-do.com/association.html •
