22 morti torna ind’un attacca rùssia in Kyiv stu 5 di lugliu. È ghjè tutt’una generazione di ghjente sacrificati da l’orgogliu d’un omu. Parte ucràiniana rispòndenu cù droni è mènanu tutte l’infrastrutture rùssie. O Signore fatte ch’ella finisce sta guerra !
Millaie d’èttari brusgiati in Francia, l’Occitania hè in focu. Sicchina, suleoni è ventu infiaranu e Pyrénées Orientales, a Provence, u Languedoc… più di 10.000 personi sò state evacuate. Un spaventu per l’abitanti è pè i turisti. L’Unione Aurupea hà mandatu rinforzi aèrei. Una squadra di 17 spendifochi corsi, dui camiò, trè vitture è dui chars sò stati dinù mandati in Perpignan per sustene i spendifochi catalani chì scumbàttenu contr’à l’incèndii sott’à timperature sin’à 45 gradi… Sulidarità cù l’Occitania è a Catalogna marturiata !
6 impiechi di l’Istitutu regiunale d’amministrazione di Bastia puderèbbenu smarisce per via d’una ristrutturazione generale di l’IRA in Francia. L’impiecati sò inchieti. Michè Castellani, deputatu di u Cismonte hà scrittu à u primu ministru per dumandali d’ùn sacrificà l’IRA di Bastia. « Vi dumandu di tene contu di u rolu irrimpiazzèvule ch’ellu ghjoca l’IRA di Bastia in a vita ecunòmica, suciale, è culturale in ssa cità digià fràgile, ind’un ìsula fràgile anch’ella » hà dettu u nostru deputatu.
750.000, hè u prezzu in àuri ch’hà custatu u primu centru di succorsu in muntagna di Francia è ghjè a Corsica chì n’hà presu l’iniziativa. Face 40 anni ch’ellu era aspettatu. « Avemu cuminciatu ind’una caravana » hà dettu l’aiutente Laurenzu Acquaviva ch’hà salutatu tutti i spendifochi chì s’impègnanu per porghje sustegnu à a ghjente persa in muntagna.
U centru hè finanzatu à 40 % da u Statu. « Avemu da pudè travaglià in bone cundizioni, sin’à avà ùn avìamu chè 40 metri quadrati. Oghje avemu da pudè accansà u nostru materiale, furmacci è esercitacci, cù un muru per appichjassi. Hè un bellu arnese pè a prufessione ».
11. Hè l’ondecèsima edizione di FestiLumi in Bonifaziu da u 2 à u 4 di lugliu. Bellìssima iniziativa chì illumineghja i muri di a cità cù pruiezzione di stampe culurite è creazioni artìstiche maiò. Quist’annu u tema è l’universu di u futbolu corsu. Una decina d’òpere èranu cusì da scopre à traversu a cità, da a Marina sin’à a vechja villa, nant’à e ghjesgie, e piazze, i carrughji… L’avete mancatu quist’annu ? Vi tocca à aspettà l’antru annu chì vene per scopre ssa bella manifestazione ch’adunisce millaie di personi in Bonifaziu. https://www.festilumi.fr •
