200.000 manifestanti omancu in Tirana in Albania l’11 di lugliu, sempre contr’à u prugettu turìsticu di a famiglia Trump in un spaziu eculògicu sensìbule… Dapoi più di 40 ghjorni avà, sò decine di millaie à dassi appuntamentu di fronte à i scagni di u guvernu è à sfilà in carrughju tutte e sere.
Ssu prugettu scemu hè stimatu à quasi 5 milliardi di dòllari per custruisce alberghi è villà di lussu, strughjèndusi una biodiversità magnìfica, frà i quali i fiamenghi rosi. Danu cusì u so nome à sta mossa pupulare : a rivuluzione di i fiamenghi rosi. A ghjustizia albanese inchiesta dinù per sapè cumu sse terre sò state cumprate, è cumu serà ch’ellu hè cresciutu u so valore da 5,5 millioni d’àuri à 122 millioni in pochi mesi. « L’Albanìa ùn hè à vende » mùghjanu i manifestanti.
18 mesi di prigiò attempati : stu 10 di lugliu, un animatore perisculare hè statu cundannatu per agressione sessuale nant’à una ciuccia da 3 à 5 anni trà u 2023 è u 2025 in una scola di u 10u circondu pariginu… L’omu hà fattu appellu è cuntinueghja à nigà. L’affare scuzzula dapoi parechji anni. Dui altri animatori sò stati assolti pruvuchendu a còllera d’un cullettivu di parenti. Èranu accusati di viulenze sessuale nant’à nove cinnini. Dapoi u principiu di l’annata, 132 animatori sò stati suspesi di e so funzioni frà i quali 52 suspettati di « viulenze sessuale o sessiste ». U scàndalu hè cusì sparsu ch’omu u chjama ormai « l’affare di u perisculare »…
2,7 millioni di personi si sò mosse contr’à u ritornu di i neonicotinoidi, finalmente censuratu da u Cunsigliu custituziunale in Francia. Puru, u Senatu vene di dà u s’accunsentu di i neonicotinoidi, pruposta da Laurent Duplomb in u quadru di a lege d’urgenza agrìcula. Nanzu d’esse aduprata, a lege deve esse aduprata senza mudificazione da l’assemblea naziunale. Dinù meri, cunsiglieri municipali, eletti dipartimentali è regiunali sò « grandi elettori » à l’elezzione senaturiale. Più di 1.500 frà elli anu zifratu una tribuna in a Gazette des Communes per dì ch’elli ùn susteranu micca i senatori chì vuleranu autorizà ssi pesticidii periculosi pè a salute è abiodiversità. Pudete dinù sustene chjamendu u vostru merre per invitalu à ziffrà sta tribuna annant’à shaketonpolitique.org.
14 di lugliu di u 1755, Pasquale Paoli, vultatu in Corsica da u so esiliu in Nàpuli, hè pruclamatu capugenerale di a Nazione Corsa à u Cunventu Sant’Antone di Casabianca in Castagniccia. Dà una custituzione à a Corsica ch’hà da smaraviglià u sèculu di i lumi, cù drittu à a felicità, spicanza di i puteri, elezzione di i raprisententi à u suffragiu universale, votu di e donne capi di famiglia… Apre un università per furmà a giuventù, batte muneta, si dà una marina per difende e coste è fonda una cità purtuare, Lìsula, sviluppa l’agricultura, sparghje una ghjustizia, dura ma ghjusta. Diventa u « Babbu di a Pàtria ». Disgraziosamente, u rè di Francia ùn l’entende micca cusì è manda in Corsica a so putente armata è cunniscimu a sèguita.
U 14 di lugliu di u 1789, torna, Paoli si rimette à sperà. Dopu à presa di a Bastille in Francia, volta d’esiliu sin’à in Parigi induve l’acclàmanu i rivuluziunarii francesi. U 14 di lugliu di u 1790 sbarca in Macinaghju, s’inghjinuchja è basgia a terra di Corsica. Ma tamanta speranza serà di cort’andà. Dichjaratu « traditore » pè e so crìtiche di u regime di terrore giacubinu (ùn accetta micca e scapere), riparte in esiliu in Inghilterra induv’ellu more U 5 di ferraghju di u 1807. •
