150.000 morti omancu, 14 millioni di spiazzati, dapoi u 2023 a guerra di u Soudan hè tremenda, è si ne parla pocu. A metà di a populazione, vale à dì circa 25 millioni di personi pate a fame è mena dinù l’epidemia di u cholerà. A guerra è a so mansa d’atrocità impedisce di sparghje l’aiutu umanitariu. Dui capimilitari s’affròntanu è pruvuchèghjanu ciò chì l’ONU chjama « a peghja crisa umanitaria è di spiazzamentu di populazione à u mondu, u Soudan hè ind’un urgenza umanitaria spaventèvule ». 34 millioni di personi anu bisognu d’aiutu è a metà sò zitelli dice torna l’ONU.
1.300 morti è 5.000 spariti, ghjè u novu bilanciu di l’inundazioni à u Nepal è u Tibet. Puru 10 ghjorni dopu à a catastrofa, si tròvanu sempre personi vive sott’à a fanga.
3.536 milliardi d’àuri, hè u prezzu di a dèbbita pùblica francese, vale à dì 117,5 % di u PIB di u paese. Hè a dèbbita a più gattiva di l’Unione aurupea ch’impone d’ùn francà i 60 % di u PIB. Solu a Grècia (143,5 % di u PIB) è l’Italia (138,9 %) pàrenu più gattivi, ma a dèbbita francese hè a più impurtante per raportu à u paese. Per un dettu, a dèbbita pùblica di l’Allemagna hè di 63,5 % di u so PIB. A situazione dunque di a Francia hè gattiva assai, è impeghjurisce torna. Secondu Bercy, l’effettu di a sicchina raprisenta una pèrdita in più di 0,1 puntu di crèscita per l’ecunumia francese.
160 studienti in Parcorsu d’accessu specìficu à a salute (PASS) quist’annu à l’Università di Corsica ! 40 altri saranu in licenza d’accessu salute è s’apre quist’annu a terza annata di medicina cù 41 studienti. S’era aperta a seconda annata in 2025 pè a quale ci saranu 48 piazze quist’annu. Vale à dì chì Corti accoglie avà u primu cìculu sanu di medicina ! L’insignanti vènenu da l’Università è l’ospidali di a facultà d’Aix-Marseille. Un partenariatu cù l’Unione regiunale di i prufessiunali di a salute (URPS) di i duttori liberali corsi permette d’accumpagnà in tantu chè cumpare i studienti è dalli a voglia di rivene in Corsica dopu à i so studii. U scopu oghje hè di pudè apre à u più in fùria u secondu cìculu di medicina è incuragisce cusì a creazione di u CHU di Corsica.
30 elevi novi fàcenu a so rientrata à a scola d’ingenieri Paoli-Tech creata in 2011 in lea cù l’Università di Corsica. S’apre quist’annu una terza prumuzione in agronomia, creata in 2024, chì s’aghjusta à quelle energètiche Smart Buildings è Smart Grids. A dumanda hè forte per ssa scola chì ci hè circa trè candidature pè una piazza. Dice u so presidente, Jean Nicolas Antoniotti, « a Corsica hè un furmidèvule laburatoriu di e grande sfide di u nostru tempu, da priservà è megliu rege l’acqua, rinfurzà a nostra autunumia alimentaria, addattacci à u scambiamentu climàticu, cresce ver di l’autunumia energètica. Custruisce dumane a nostra suvvranità numèrica è ammaestrà l’intelligenza artificiale, furmà ingeniori quì, nant’à ss’inghjochi, ghjè appruntà l’avvene di a Corsica. Ghjè dinù trasfurmà e custrinte di l’insularità in innuvazioni è sviluppà suluzioni capace dumane di spàrghjesi aldilà di a nostr’ìsula. Hè quì l’ambizione di Paoli Tech : furmà quì, innuvà quì, è fà di a Corsica un territoriu d’eccellenza è di sperimentazione. » •
