111 millioni d’elettori scritti in Russia per l’elezzioni legislative à a Dumà. Ma quantu anu pussutu vutà cum’elli vulìanu ? Ùn ci hè statu surpresa dunque è u partitu di Poutine vince largamente : l’uppusizione chì brama a fin’di a guerra in Ucràinia ùn hè stata autorizata à prisentassi… Tuttu hè dettu.
17 millioni di francesi di più di 18 anni, vale à dì 37% di a pupulazione sòffrenu di mubilità precaria. Èranu 15 millioni dui anni fà, è 13,3 millioni quattru anni fà. Ghjè dì quant’ella s’impeghjurisce a situazione di a puvertà in Francia. Stu sundagiu hè statu fattu nant’à 13.400 personi di 13 regioni di Francia, Corsica cumpresa (Ipsos BVA è a piattaforma Wimoov). Ùn pudè spiazzassi ingattivisce a situazione ecunòmica è suciale di e personi ch’anu difficultà à truvà un travagliu, à fà stùdii, à andà à curassi, eccèttera. Dice Wimoov, « a mubilità hè diventata un fattore di precarità è ingattivisce l’inegualità socio ecunòmiche è territuriale. E difficultà à mòvesi ùn sò solu a cunsequenza di a debbulezza ecunòmica di e famiglie, ne divèntanu dinù una càusa diretta. »
Un antra inchiesta cummandata da u Succorsu Pupulare conta una situazione assai gattiva in Francia. A crèscita di i prezzi è a calata di i bugetti suciali mèttenu di male in peghju e populazioni e più dèbbule. 40% di l’attivi in Francia dìcenu chì i so rivenuti ùn li permèttenu micca di copre tutte e so spese. Èranu 30% in 2025 : 10 punti in un annata sola ! 37% dìcenu ùn pudè manghjà à a so fame (58% frà i smicardi). 29% anu già saltatu un ripastu. 30% anu rinunciatu à curassi.
124 personi sò morte in u mondu in 2025, assassinate per via ch’elle difendìanu l’ambiente. Hè l’ONG Global Witness chì a dice è chì face ssu tristu contu ogni annu. Frà sse vìttime hè statu presu in contru u sindicalistu agrìculu di Via Campagnola, Petru Alessandri, assassinatu u 17 di marzu di u 2025. I cunflitti in lea cù u fundariu sò à l’urìgine di a maiò parte di i cartulari ch’ella tratta l’ONG, qualesia u paese. Parte di a ghjustizia francese, ùn si ne sà di più nant’à l’inchiesta. Via Campagnola, l’associi di difesa di l’ambiente, i cullettivi antimàfia, dinùnzianu u silenziu di l’autorità francese è dumàndanu ghjustizia per Petru Alessandri.
20 anni ! Corsica Diaspora hè statu creatu in 2004. 20 anni à rinfurzà e lee trà i Corsi di quì è i Corsi di a spalluzzera. Oghje, cù u so novu presidente Tumasgiu Linale, è cù l’impegnu di l’Agenza di u sviluppu ecunòmicu (ADEC) è a Cullettività di Corsica, l’associu lancia un grande prugettu pè i cinqu’anni à vene, da rinfurzà torna u so retale è prufessiunalizà sta lea cù a diaspora. Dice u presidente vulè « mubilizà tutti i Corsi chì sprìmenu un interessu per l’avvene di l’ìsula, favurizà una dimarchja pragmatica è strutturata à favore di a nostr’ecunumia, da u fora ver di a Corsica ma dinù da a Corsica ver di u fora. Infine sviluppà una dinàmica specìfica, creendu cundizioni da chì l’impiechi ind’è l’ìsula sìanu pruposti à a diaspora, da fanne una riserva pè u riclutamentu quandu a pupulazione residente ùn basta micca à i bisogni. » Da quì à pocu, Corsica Diaspora ferà sapè e so pruposte in ditagliu « da animà u retale, imaginà arnesi nuvatòrii mettendu l’impiecu è l’impresi in core di a dimarchja. Infine creà dispusitivi interattivi d’assistanza trà Corsica è diaspora. » •
