20 feminicìdii in Francia in mancu trè mesi, ghjè u situ noustoutes.org chì a dice. Avìanu trà 23 è 86 anni. 167 sò morte in u 2025. 141 in 2024. 136 in 2023… Bilanciu tremendu sempre in crèscita.
70 % è più… ghjè u percentuale di droni rùssii strutti da l’armata ucrainiana di ferraghju. I droni intercettori ucrainiani anu struttu 1.500 droni rùssii detti Shahed, di fabricazione iraniane. L’Ucràinia cù mezi limitati, s’hè fattu una specialità di ssi droni intercettori chì permèttenu di strughje droni o missili d’attacca rùssii. Ma i droni ucrainiani ponu ancu attaccà micca solu difende. Ind’è a nuttata di vènari à sàbatu scorsu in e regioni di Zaporijia è Kherson, anu struttu quattru sistemi di missili aeriani automotrici rùssii. Torna una prova di l’efficacità stratègica in crèscita di i droni ucrainiani. Volodymir Zelensky hà parlatu cù parechji paesi di u Mèdiu Oriente per aiutali spartendu a so capacità di difesa contr’à i droni. Hà fattu sapè dinù ch’ella era pronta à aiutà i Stati Uniti nant’à stu puntellu di pettu à a minaccia di i missili è droni iraniani.
33 millioni di personi minacciate di more di fame à u Sudanu nant’à 51 millioni d’abitanti. U paese patte a fame, è a situazione hè ingattivita per via di a guerra interna ch’hà fattu circa 10 millioni di spiazzati. Per via di a guerra, l’agricultura è u cumerciu ùn viàghjanu più, l’infrastrutture sanitarie sò strutte o disurganizate, i zitelli sòffrenu di malnutrizione, pè u più in u Darfuru, l’aiutu umanitariu ùn ghjunghje à spàrghjesi. U paese ùn conta tantu pè a cumunità internaziunale. U mondu hè troppu occupatu à ciò chì si passa in Iranu o in Ucràinia.
2 millioni di passageri invece di i 9 previsti da l’esperti di l’èpica è i prumutori d’astracu… u dibàttitu nant’à u portu in Bastia eccittèghja i candidati à l’elezzioni municipale. Trè ozzioni : cinque liste (dritta, strema dritta, cumunisti è murgantisti, spècia di mischiu trà manca clanista è affaristi) difèndenu u portu dettu di a Carbonita ch’ùn hà mai (ancu assai) cunvintu, per vìa di e so dimensioni smisurate, a gabegìa finanziaria è a gestione rigalata à uperatori privati à u so solu prifittu. A lista di manca di Bastelica prumove un ameliurazione di u portu attuale. È a lista Bastia Inseme cundutta da Gilles Simeoni brama un portu novu in locu è piazza di u portu attuale, megliu dimensiunatu, menu custosu, più rispettosu di l’ambiente è di l’avvene di Bastia chì quellu di a Carbonita.
2.000 persona è ancu di più per stà à sente I Muvrini à l’Olympia stu 4 di marzu in un ambiente scemu è una sala carca à trunchera. Sò parechje millaie di personi à longu à u so giru nant’à u cuntinente. U gruppu adunisce mondu ghjente ghjunta à l’incontru di a Corsica in tutti i paesi di Francia è di Navarra ! I cummenti dopu u cuncertu sò ancu di più impressiunanti. « Màgicu… magnìficu… mumentu suspesu… strasurdinariu… ». I Muvrini spàrghjenu u migliore di a Corsica. Sò i nostri più belli imbasciadori. Da ringraziali. •
