89 % di i Cubani càmpanu sott’à u livellu di puvertà è 7 Cubani nant’à 10 sàltanu omancu un ripastu à u ghjornu… Millioni d’abitanti senza elettricità, penuria di medicamenti, crèscita di a murtalità zitellina, ch’hè stata multiplicata per trè in cinqu’anni secondu i Nazioni Uniti…. Cuba hà persu 25 % di a so populazione, hè a calata demogràfica a più ràpida à u mondu. U paese era sott’à embargò dapoi u 1960 è a rivuluzione cubana di Fidel Castro. L’amministrazioni Obama eppò Biden avìanu ridottu un pocu e sanzioni ma cù Trump a situazione s’hè impeghjurita, impedisce l’impurtazione di medicamenti per un dettu è 70 % di e medicine di prima necessità màncanu allora chì l’epidemie si scatinèghjanu. Cù u mancu di carburante è d’elettricità, i trasporti pùblichi ùn viàghjanu più è i lozzi impuzzichìscenu i carrughji sparghjendu malatie. U Venezuela parava à u mancu di petroliu ma dapoi a cattura di Maduro, i Stati Uniti blòccanu l’espurtazione per Cuba è minàccianu l’altri paesi chì volerèbbenu aiutala cume u Messicu. U guvernu cubanu accusa i Stati Uniti di pruvucà una crisa umanitaria. In quantu à Trump, hà palisatu vulè piglià u cuntrollu di l’Ìsula…
72.239 morti è 171.861 feriti in a banda di Gazà dapoi u 7 d’ottobre 2023. Ghjè u bilanciu di a guerra cundutta da Israele. È dapoi a trègua di u 10 d’ottobre 2025, sò 663 palestiniani chì sò stati tombi è 1.762 altri feriti sott’à e bombe israeliane, secondu l’agenzia di stampa palestiniana Wafa.
67 suldati ucrainiani ch’èranu prigiuneri da l’armata rùssia in u Donetsk, sò stati liberati durante una missione di salvezza u 14 di marzu scorsu. L’armata ucrainiana hà lucalizatu i so suldati in gràzia à i so servizii secreti, pò un commandò hè passatu in un tunellu sfussulatu sottuterra per surprende a difesa rùssia è entre in u campu induv’elli èranu chjosi. L’operazione s’hè passata in qualchi minuta, tutti i suldati sò stati liberati è evacuati cù elicòtteri senza chì i suldati rùssii pòssinu risponde. Umbeh… rinsignamentu, infiltrazione di forze speciale daretu à e lìnee nemiche, estrazzione di 67 ostagi… l’armata ucrainiana mostra capacità impressiunante…
+11 % d’agressioni razziste quist’annu in Francia. Ci n’era digià +30 % annu scorsu… Sò decine di millaie à avè manifestatu un pocu dapertuttu in Francia sàbatu u 14 di marzu per dì innò à u razzìsimu, u fascìsimu è pè a difesa di e sulidarità. Eppuru, mondu elettori anu torna fattu a scelta di candidati Rassemblement National stu 15 di marzu…
Qualchi decina di « sustenitori » bastiacci (hè megliu di mette a parulla trà virgulette) sò entruti in u stàdiu Armand Cesari dopu à a disfatta contr’à Boulogna per dì a so zerga di i risultati di u Sporting. Banderole brusgiate in tribuna Este, a stessa ch’avemu pientu è aspettatu durante annate è annate, frischji contr’à a squadra, inghjulie contr’à i ghjucatori è i dirigenti nant’à e rete suciale… ùn hè cusì ch’elle anu da accunciassi e cose di sicuru, spessu sapendu chì uni pochi di sta tribuna anu partecipatu à mette u club à paghjolu… Sustene una squadra ghjè sustènela in i belli cum’è in i gattivi mumenti. U Sporting face a so peghja stagione dapoi un pezzu, ma pò quantunque sempre mantènesi in Lega 2 chì ùn hè chè à quattru punti di i barrasgi. Per quessa ci volerebbe ch’ellu vinci qualchi scontru è ùn hè cù i frischji o e chjame à a demissione ch’ellu ci ghjunghjerà… •
