Un millione è più di personi sò state ubligate di lascià a so casa è i so lochi in u Libanu per fughje a guerra imposta da Israela. Un terzu sò zitelli. Duverìanu esse à a scola à amparà, ghjucà, ride, sunnià… Invece sò nant’à e strade, senza tetti, sott’à e bombe.
73 % ghjè a calata di e pupulazioni d’animali vertebrati salvàtichi st’ùltimi cinquant’anni. Pulluzione, sfurestazione, caccia for’di lege, cambiamenti climàtichi… « Quandu l’impatti s’amànsanu è tòccanu un certu livellu, u cambiamentu s’alimenteghja da sè stessu pruvuchendu un ciambuttamentu tremendu, bruttale è putenzialmente irriversìbile : un puntu capitòndulu » dice l’associu di difesa di l’ambiente WWF. 35.000 pupulazioni di 5.495 spèzie di mammiferi, acelli, pesci, rettili è anfibiani sò stati studiati. E spèzie d’acqua dolce sò a più forte calata (-85 %), pò vènenu e spèzie terrestre (-69 %) è marine (-56 %). I declini i più forti sò custatati in Amèrica latina è in e Caraìbe (-95 %), pò in Àfrica (-76 %) in Asia è in u Pacificu (-60 %).
155.000 personi è più anu ziffratu (puntu à u 7 d’aprile 2026) a petizione di Pollinis per dì innò à a sregulazione di i pesticidii. Pollinis hè un ONG di difesa di l’ambiente. Oghje, i pesticidii sò esaminati tutti i
10 o 15 anni, hè pocu ma omancu sta misura hà permessu d’interdisce una vintina di pesticidi cum’è i neonicotinoidi chì tòmbanu l’ape, o altre sustenza ch’impedìscenu à u cerbellu di i zitelli di sviluppassi, spieca Pollinis. Sott’à a pressione di i lobbì di l’agruchìmica, a Cummissione aurupea vole mudificà stu regulamente chì permette d’agisce nant’à l’autorisazione di i pesticidi. Ormai, sè e misure di sregulazione sò aduprate, certi pesticipi ùn puderanu mai più esse interdetti ancu sè a prova scientìfica di u so perìculu hè appurtata. Solu a Cummissione averà u putere di decide o nò di a so interdizzione in Auropa. Ziffrate a petizione nant’à mobilisation.pollinis.org : https://bit.ly/48tyTpY
37. Hè u nùmaru di punti chì spicca u primu di Lega 2 di ghjocu à pallò (Troyes, 58 punti) è l’ùltimu (Bastia, 21 punti)… Cù solu 3 vittòrie, 14 fiaschi è 12 parità, u Sporting campa a so peghja stagione dapoi parechji anni. Bastia ùn hà più vintu dapoi u mese di ghjennaghju…
6, hè a piazza ch’ellu piglia u liceu di u Fium’Orbu in a classìfica di L’Étudiant frà i migliori licei di Francia. Sò presi in contu ind’è ssa classìfica, i risultati à u bascìglie, u nùmaru di menzioni, l’accumpagnamentu pedagògicu di l’elevi. Cinque altri licei corsi si ritròvanu frà i 100 primi nant’à 2.200 licei esaminati. U liceu di Balagna in l’Ìsula Rossa 14u, u liceu Jean Paul de Rocca Serra di Portivechju 27u, u liceu Paul Vincensini di Bastia 35u, u liceu Laetitia Bonaparte in Aiacciu 39u, u liceu St Paul in Aiacciu, 93u. •
