1,7 millione di morti. Hè u bilanciu stimatu di u genocìdiu armenianu in 1915 è 1916 nant’à una populazione tandu di 2,5 millioni d’armeniani . L’altri sò stati esiliati di forza. Una stirpera urganizata da l’imperu ottomanu (a Turchia oghje). U Statu francese hà fattu di u 24 d’aprile una ghjurnata di cummemurazione per via di l’arrestazione di 600 intellettuali per esse assassinati, marchendu u principiu di u genocìdiu.
U cuntestu di a prima guerra mundiale hà permessu à i turchi di piattà sta stirpera. A Turchìa ùn hà mai ricunnisciutu u genocìdiu.
10 alti rispunsèvuli militari o di i servizii secreti di i Stati Uniti sò stati « ringraziati » dapoi un annu. L’ùltimu, hè John Phelan, u secretariu à a marina americana. Dopu à u generale Charles Brown, capi di statu magiore interarmate, l’amirale Lisa Franchetti, capi di l’operazioni navale, u generale James Slife, nùmaru 2 di l’US Air Force, u Generale David Allvin, capi di statu magiore di l’armata di l’ària, l’amirale Alvin Holsey, capi di e forze in Amèrica centrale è di u sud, u generale Randy George, capi di statu magiore di l’armata di terra, u generale David Hodne, cumandante di l’intrenamentu di l’armata, u generale William Green Jr, capi di u corpu di i cappellani militari. Più altu rispunsèvule di a marina americana, John Phelan cum’è l’altri hè statu rinviatu senz’altra spiecazione in piena guerra contr’à l’Iranu. S’aghjusta u rinviu di Timothy Haugh, à capu di u putente serviziu di rinsignamentu è spia, a NSA (National Security Agency). Cù ellu rinviatu dinù u nùmaru 2 di l’agenza Wendy Noble. Trump pulisce i so scagni…
40 battelli sò partuti da Barcelona u 17 d’aprile per porghje aiutu à Gazà sempre sott’à u blocchime d’Israele. U 25 d’aprile un antru battellu l’hà raghjunti da Corsica, à l’iniziativa di u cullettivu corsu per una pace ghjusta è durèvule in l’Oriente vicinu. A dimarchja chjamata « Global Sumud Flottilla » porta materiale umanitariu, ma porta sopratuttu a sulidarità aurupea pè a libertà, a ghjustizia è a dignità in Gazà. « A liberazione di a Palestina ùn pò esse spiccata di a ghjustizia mundiale » dice u so cumunicatu. Sta flotta hè a più grande missione marìttima civile di a stòria in favore di a Palestina. S’aspèttanu una centinaia di battelli. Una prima prova era vultata in daretu in 2025 per via di u gattivu tempu. Parechji altri battelli taliani ingrusseranu a flotta in Siracusa. L’azzione vole mubilizà da chjamà i rispunsèvuli di e nazioni unite à mette in ballu un curridoghju umanitariu è un azzione cuurdunnata nant’à u trasferimentu d’arme à Israele. U puntellu di st’azzione serà un cungressu maiò in Brussella.
170 anni ! L’acqua citosa hà festighjatu un bellu anniversariu u 24 d’aprile scorsu. Èranu numarosi in giru à a surgente d’Orezza in Rapaghju per ammentà u caminu parcorsu. Orezza oghje hè urganizata in Cooperativa d’Interessu Cullettivu è ferma frà e più belle fiure ecunòmiche di a Corsica. Ne riveneremu à parlanne. •
