Stu 18 di marzu, a Russìa è l’Amèrica duvìanu parlà inseme di l’Ucràinia. Ella, ùn hè micca invitata à a discussione. Hà dettu Donald Trump… « pensu ch’avemu da parlà di e terre. Ci hè assai terre. Hè sfarente di nanzu à a guerra, a sapete. Parleremu di e terre, parleremu di l’usine elèttriche… parleremu di u spartimentu di certi averi »… Poutine ellu, vole tènesi e terre ch’ellu hà pigliatu cù a forza è u sangue sparsu ucrainianu, è forse qualchi terra in più. Ùn vole micca chì l’Ucràinia possi entre ind’è l’Otan è ind’è l’Unione aurupea. Hà dettu ch’ellu bramava chì u prugettu di Trump sìa « rimanighjatu ». Hà fattu sapè torna, da a voce di u so ministru di l’affari stranieri chì a Russìa era upposta à a presenza di suldati di l’Otan in Ucràinia, « pocu imprema cum’è omu a chjama, cuntingente di l’Unione aurupea, di l’Otan, o à l’iniziativa d’un paese ». Vale à dì ch’ella vole chì l’Ucràinia sìa sola è ch’ella accetta di perde parte sane di u so territoriu allora ch’ella hè stata attaccata, marturiata, da a vuluntà di putenza di u vicinu rùssiu… Quesse sì chì sò neguziazioni ! È per chì gèneru di pace dopu ? In quantu à l’Ucràinia, hà datu u so accunsentu à l’Amèrica nant’à un arrestu di u focu di 30 ghjorni. Ma brama u ritiru di e truppe rùssie è dumanda guaranzìe di securità per l’avvene. Brama dinù di pudè esse prutetta da l’Otan è di entre ind’è l’Auropa. Moscù cuntrolla quasi 25 % di u so territoriu, cumpresu a Crimea occuppata dapoi u 2014. Cù l’Amèrica, a resistenza era pussìbule. Di pettu à duie putenze imperialiste chì pàrenu sèntesi per spàrtesi e so ricchezze, cumu fà ? L’Amèrica di Trump, di a suvranità di l’Ucràinia si n’impippa. Dapoi u ritornu di Trump à a Casa Bianca, i Stati Uniti anu cambiatu di versu, aduprendu e pusizioni di a Russìa è accusendu Kiev d’esse à l’urìgine di u cunflittu. Chì stòmacu ! U presidente di i Stati Uniti alliscia à Poutine per vìa di u so pròpiu appetittu, bramendu d’integrà u Canadà è u Groenland (ch’appartene à u Danemark) à u senu di i Stati Uniti, da pudè spluttà à u so prufittu e so ricchezze. Si spàrtenu tremindui u mondu senza vergogna. È Trump hà riesciutu a rimette Poutine in pusizione di forza allora ch’ellu era inditatu da a cumunità internaziunale, è ancu in mira di a Corte penale internaziunale. Ècculu più forte chè mai à impone i so desiderii. Quattru personi nant’à cinque in Ucràinia anu persu qualchisìa, mortu o feritu ind’è sta guerra. Una guerra chì dura dapoi 11 anni. Trè anni chì i suldati càmpanu in e trancee ind’è l’orori cutidiani di u sangue di i soi morti sott’à e bombe. A « pace » chì pare esse neguziata trà i dui imperialìsmi averà un gustu più chè aspru s’elle si cunfèrmanu e parulle orgugliose di Trump. È dopu ? Sè l’Amèrica è l’Auropa accunsèntenu à ùn mandà suldati per guarantisce a pace, Poutine ùn averà mancu bisognu d’invade torna l’Ucràinia, basta à fà ciò ch’ellu hà fattu pè u Donbasu… vale à dì una pulìtica di pupulamentu per chì sta terra vene soia è per bugiardà dopu ch’elli sò maltrattati i Rùssii in Ucràinia… Basta dinù à manipulà i scrutini è à mette à capu di u paese rispunsèvuli pro rùssii. A sa fà. Pòvera Ucràinia. •
