Partitu di a cusì detta « priferenza naziunale » chì gira u spinu à a sulidarità umana quì in Francia, è à a sulidarità di e nazioni ind’un mondu è ind’un Auropa induv’ugnunu hà bisognu di l’altru per avvanzà è nimu ùn pò campà senza sulidarità. Partitu prontu à chjode e fruntiere è à rinvià in paesi di guerra è di miseria omi, donni è zitelli, disprezzendu e cunvenzioni internaziunale di i diritti di l’omu. Partitu prontu à lampà fora di casa disgraziati per vìa di a so urìgine, ùn fendu più criteri di ghjustizia suciale, mà criteri raziali ind’è e pulìtiche d’alloghju… Partitu chì disprezza i diritti di e donne, minaccia u drittu à l’abòrtulu è chì dinunzia e viulenze fatte à e donne in carrughju per piglià megliu in mira l’immigrazione, ma ch’ùn si preoccupeghja micca di e viulenze sessiste è sessuale. 90 % di sse viulenze sò viulenze di prossimità, in casa, in famiglia o à u travagliu, è micca u fattu di i migranti. U RN hè uppostu dinù à l’insignamentu di e lingue regiunale, Marine Le Pen s’hè detta pè a suppressione di e regioni, è contr’à e so aspirazione à l’autunumìa… è si sà ch’ellu hè chjaramente contr’à u l’autunumìa di a Corsica…
Mà… ùn sarebbe chè per l’ambiente, u RN hè una catastrofa. Hè sinònimu di rinculu in quasi tutti i settori di l’ambiente è a cumunità scientìfica è l’ONG di difesa di l’ambiente alèrtanu nant’à u denecu di a lotta contr’à u riscaldimentu climàticu. U RN hè nemicu di l’eculugìa. Sustene l’agricultura intensiva, l’allevu industriale, a priservazione di i prufitti di l’indùstrie e più pulluante, l’OGM è i pesticidii. Ùn face casu di a pèrdita di a biodiversità è di a so necessaria prutezzione. Vole apre a spluttazione à u gaz di scistu in Francia, e so pulìtiche cunducerèbbenu à a fine di a lotta contr’à a pulluzione di l’aria o di l’acqua. Vole ripiglià a spluttazione di l’energìe fussile contr’à l’energìe rinuvelèvule, vale à dì fendu cresce a nostra dipendenza energètica. Hà dettu pocu fà Marine Le Pen ch’ella vulìa « piantà l’energìe rinuvelèvule ». Per Greenpeace France, « a strema dritta hè a scelta a più peghja pè a prutezzione di u climà è di a biodiversità ». Hè dinù a favore di u rinforzu nucleariu è secondu i specialist di l’energìa a so pulìtica sarebbe periculosa pè i prezzi è sinònima di penurìe energètiche. « Ùn ci hè nisun prugramma ambientale à u RN. U climà ùn hè mancu un sughjettu. Per elli, ghjè l’ambiente chì si deve addattà è micca u cuntrariu » alerta France Nature Environnement. « A biodiversità ùn esiste micca, e mubilità ùn esìstenu micca, l’oceani ùn esìstenu micca… » dinunzia L’Amichi di a Terra. « Dapertuttu induv’ellu ci hè eletti di strema dritta, à tutti i livelli territuriali, scuntremu difficultà. Ci pàrlanu senza rispettu, ci impedìscenu d’adunìsceci, d’entre in i lucali pùblichi, d’esse aiutati da i soldi pùblichi per missioni d’interessu generale » dice torna France Nature Environnement. A criminalisazione di i militenti eculugisti messa in ballu da u guvernu Macron sarebbe torna ingattivita cù a strema dritta. U RN hà dettu vulè indurisce a ripressione. Hà annunziatu ch’ellu caccerebbe a dedduzzione fiscale pè i doni fatti à l’associ di difesa di l’ambiente per vìa ch’elli sò contr’à u nucleariu è ch’elli lòdanu a disubbidienza civile. Hè una minaccia nant’à l’esistenza stessa di numarosi associ. È una minaccia pè a demucrazìa. •
