In u 2022, una rivolta pupulare hà scuzzulatu a Repùblica Islamista d’Iranu dopu à l’assassinu di Masha Hamini, ch’ùn avìa micca messu u velu islamistu. U regime hà apertu u focu nant’à i manifestanti. Centinaie d’omi, di donne è di zitelli sò stati tombi, millaie sò stati feriti. Centinaie sò spariti. Millaie torna sò stati imprigiunati. Sò sprezzati i diritti umani. U Regime face a caccia dinù à e persone LGBT, è à e minurità ètniche o religiose. A tortura hè praticata di manera regulare. Dinù e punizioni curpurale, flagellazioni, amputazioni, accecamenti, lapidazioni… Centinaie di personi, omi o donne, sò state cundannate à a morte, cù prucessi speditivi. Ci sò state parechji esecuzioni pùbliche dinù, senza prucessi. E prigiò sò tracarche è e so cundizioni di vita ùn sò micca umane, privazione di medicamenti, prublemi di risanamentu, mancu d’acqua è di nutrimentu, si dorme in terra cù scaravagli, cìmice, pidochji, topi. U regime di i mollah hè dittaturiale, affuchendu a libertà di spressione, d’associu o di reunione. I partiti pulìtichi indipendenti sò difesi, dinù i sindicati, ùn ci hè micca drittu à a greva, è a mìnima manifestazione hè interdetta è reprimata in u sangue. Parechji sò stati tumbati à palle, ind’u spinu. E famiglie di ssi martiri ùn anu drittu à dinunzià, nemancu à dumandà nutizie di i soi, sò sùbitu imprigiunate anch’elle. U regime hà censuratu a stampa, impeditu catene di televisione, dinù i retali suciali, Instagram, Whatsapp, Facebook, Signal, Telegram, Twitter, YouTube… ùn ci hè manera di sparghje l’infurmazione fora di quella cummandata da u regime. Sò affucati dinù i difensori di i diritti di l’omu, l’avucati, i ghjurnalisti, l’eculugisti, l’artisti, i scrivani, i musicanti, l’insignenti, i studienti, dapertuttu induv’ellu si pensa troppu. E donne sò marturiate. U regime hà scrittu l’apartheid sessuale in a so Custituzione. A viulenza contr’à elle hè stituziunalizata. Sò ublicate di purtà u velu. E zitelette sò avvelenate in scola da mèttele in cundizioni di sottumissione. Ponu esse maritate à 13 anni è ancu più giòvane s’ellu a dumanda u babbu. E donne sò viulentate in prigiò. Malgratu tuttu què, sò mondu quelle chì stanu nant’à u versu di Masha Hamini, spassighjendu fora senza u velu islamistu. Crèanu accolte, u tempu di cantà una canzona (hè difesu di cantà o di fà a mùsica) o di ballà, capelli à u ventu… Quand’ella affacca a pulizza religiosa, fùghjenu ma ci sò dinù cani di guardia. Omi è donne chì si pòstanu per un dettu in i curridoghji di u metrò è quand’elli vèdenu passà una donna senza velu, sò inghjulie, sputi, colpi, nanzu di rimèttele à a pulizza religiosa. L’osservatori internaziunali è l’esperti di e Nazioni Uniti ùn sò micca autorizati à entre in u paese. Ùn ci hè nisun sanzione contr’à i pulizzeri o i funziunarii ch’anu tumbatu ghjente durante manifestazioni, o chì anu viulentatu o torturatu.
L’Iranu sustene dinù a Sirìa, l’invasione di l’Ucràinia da a Russìa, è u Hamas ch’ellu furnisce in arme, furmendu i so cumbattenti. Minaccia di sparghje in u mondu ssu cunflittu. L’Iranu ùn rispetta mancu l’accordi internaziunali nant’à u climà. Assiccamentu di i lachi, fiumi, zone ùmide, sfurestere, polluzione da tutte e mamme… di lugliu, hè statu frà l’8 paesi in u mondu à ùn vulè vutà a risuluzione di e Nazioni Unite dendu un drittu universale d’accessu à un ambiente pulitu, sanu è durèvule. Infine, u paese travaglia à ottene l’arma nuclearia… hè una vera minaccia per l’Umanità.
Ùn ci scurdemu di u corciu pòpulu iranianu è di e so donne marturiate. •
