U bilanciu di e rivolte in Iranu ferma pruvisoriu è incertu. Hè statu calmatu cù una repressione tremenda. Discitata u 28 di dicembre per via di a vita cara, a mubilisazione hè cresciuta affruntendu cù curagiu e milizie di a repùblica islamista. Centinaie di millaie di manifestanti chjamendu à fin’di u regime di i Mollah anu avutu cum’è sola risposta e fucilate è l’arrestazioni. U bilanciu hè spaventosu. L’agenzia di stampa iraniana Tasnim parla di 3.000 arrestazioni… più di 20.000 secondu associ di difesa di i dritti umani. In quantu à i morti è feriti, Amnesty Internaziunale parla di massacru. Secondu l’ONG Iran Human Rights (IHR), chì ghjove di riferimentu à l’ONU, 3.428 manifestanti sò stati tombi. Ma sò quelli sulatimente ch’anu pussutu esse identificati, è sò parechje millaie torna ch’aspèttanu à esse cuntabilizati… D’altri associ evaluèghjanu à trà 5.000 à 20.000 morti. « 12.000 è forse sin’à 20.000 » secondu à CBS News. 16.500 secondu à The Times. « Puderìamu francà e stimazioni mediàtiche e più alte » dice Mahmood Amiry Moghaddam, direttore di l’IHR. U guida supranu Ali Khamenei hà parlatu anch’ellu di « millaie di morti manighjati da i Stati Uniti è Israele »…
U putere islamistu accusa i manifestanti di « crìmini di guerra contr’à Dìu », vale à dì cundannazioni à a morte aspèttanu centinaie è forse millaie di manifestanti arrestati. In 2025, à a sèguita di a mossa Donna, Vita, Libertà, ci sò state 1500 esecuzioni. Oghje 800 cundanne à a morte sò state già decise è millaie d’altri manifestanti aspèttanu d’esse ghjudicati in prucessi espeditivi. L’altu Cummissariu di l’ONU pè i dritti di l’omu hà dinunziatu « u ricorsu sistemàticu à a pena di morte cum’un arnese d’intimidazione di Statu ». U capu di a pullizza prumette clemenza à i giòvani ch’anu partecipatu à e manifestazioni è chì si renderanu da per elli… quale a pò crede ? Decine di messagi è testimugnanze sò stati pustati nant’à i retali quandu internet hè stata rimessa in ballu. « Dopu à una settimana di sunniacci, mandu ssu post da u più prufondu di e tenebre, ùn pensu micca ch’ellu serà inviatu » dice unu. « Simu di ritornu, ma anu sigatu parechji frà noi trà mezu à e so granfie » dice un antru. « Mansa di mullizzi, fighjate simu sempre in vita ! » dice un antru. « Tutti quelli chì si truvàvanu fora èranu presi in mira… U rimore di e pistulettate era spaventosu » dice un antru testimognu. E famiglie sò state ublicate di pacà 700 tomans (vale à dì 4.725 àuri) da pudè ricuperà e salme di i soi assassinati da i Bassidji, a milizia islamista in càrica di a securità interiore. Sò state ublicate dinù di dì chì i so morti èranu membri di a milizia, è micca manifestanti, tuttu què da fà crede chì sò i manifestanti l’assassinii.
« A nostra speranza riposa à l’infora, chì quì simu imputenti » dicenu l’Iraniani. Ci sò stati millaie di feriti gravi dinù. Certi sò stati assassinati da a pulizza entruta in l’uspedali per tumbali. Un antru testimognu conta cumu i Bassidji anu presu à fucilate un camìo chì traspurtava parechji feriti. Sò tutti morti. Un antru conta avè vistu camiò carchi à salme di manifestanti assassinati svarsi direttamente in fosse cumune. Oghje, i Bassidji cuntròllanu i carrughji, arrèstanu e vitture è a ghjente, s’impègnanu à pulisce per caccià e tràccie di l’affruntamenti. Ma a rivolta, s’ella fiata un pocu, ùn hè compia. Hà da rinasce. •
