«Pè a prima volta dapoi decine d’annate, avemu da rilancià a custruzzione di reattori nuclearii ind’è u nostru paese è cuntinuà di sviluppà l’energìe rinuvelèvule » hà dettu Macron u 9 di nuvembre scorsu. Ci piglia veramente per imbecilli ! Ma cum’hè pussìbule d’avè una parolla cusì incunsequente è disprezzante pè a demucrazìa nant’à un sughjettu cusì sèriu ? Secondu à u presidente di a Repùblica u nucleariu hè a sola suluzione per risponde à a dumanda di cunsumazione di manera ecunòmica, di firmà indipendente è di tuccà l’obbiettivu di neutralità carbone in 2050. Sò bugìe tamant’à u mondu ! U nucleariu hè più caru chè tutte l’altre energìe, u so prezzu ùn face chè cresce, quandu u prezzu di l’energìe rinuvelèvule ùn face chè calà, senza cuntà u smantellamente dopu è i sèculi di pulluzione radiuattive à trattà (lozzu nucleariu pè u funziunamentu di e centrale) ! U nucleariu imprigiona a Francia in e so scelte sceme, ùn ci hè mezu d’esse « indipendente » quand’è vo avete bisognu d’uranium chè vo andate à circà in Àfrica in i lochi i più periculosi di a pianetta (Niger frà altru cù a minaccia terrurista) ! Infine u nucleariu ùn permette micca di tuccà a neutralità carbone per vìa ch’ellu ùn basta micca à a pruduzzione d’energìa ! U nucleariu ùn ghjove chè à i nostri bisogni elèttrichi, micca quelli di i trasporti o di l’alloghju chì sò sempre ingordi d’energìa fussile. L’ingaggiamenti presi da a Francia à l’Accordi di Parigi in u 2015 ùn sò stati tenuti malgratu i 56 reattori nuclearii francesi. A Francia hè u paese u più nuclearizatu di u mondu, davanti à u Giappone, a China o i Stati Uniti ! L’annunziu fattu da u presidente di a Repùblica ùn hè statu cuncertatu cù nimu (fora di EDF ch’hà sùbitu annunziatu un prugettu prontu in Penly Sena Marìttima !) U Parlamentu ùn hè statu cunsultatu, e prucedure legale è i dibàttiti cuntraditorii ubligatorii ùn sò stati fatti. Induv’hè a demucrazìa ? L’esempiu di u reattore di Flamanville hè un scàndalu tamant’à u mondu. Duvìa custà 5 milliardi d’àuri, ne simu già à 19 milliardi ! Hà presu omancu 10 anni di ritardu, è malfatture è frode sò custatate à buzeffu ! Puru EDF dumanda a custruzzione di sei altri reattori di stessa generazione in Penly, Gravelines (Nordu), Bugey (Ain), Tricastin (Droma). A pupulazione francese hè di fronte à una minaccia pisìa cù i 56 reattori in attività ! A zona di prutezzione prevista da u Statu francese in giru à e so centrale hè di 10 chilòmetri… Per un dettu, a zona d’impattu di a catastrofa di Fukushima à u Giappone si sparghje nant’à 100 chilòmetri in giru à a centrala. È l’impattu hè di 300 chilòmetri in giru à a centrala di Cernobile. Vale à dì in giru à a centrala di Nogent-sur-Seine ind’è l’Aube, dice Greenpeace, sarebbe una pupulazione trà 11 (esempiu di Fukushima) à 38 millioni (esempiu di Cernobile) chì sarebbe tocca. In giru à a centrala di Cruas-Meysse in l’Ardeche sarebbe una pupulazione trà 3 è 23 millioni chì sarebbe cuncernata. « U rìsicu zeru ùn esiste micca » dice à chì a vole sente u lobby nucleariu francese. Rìsicu di terramotu, rìsicu di sicchina (i reattori anu u bisognu di pumpà acqua di i fiumi), rìsicu terrurista, rìsicu di panna (sò vechje e centrale è si multiplichèghjanu l’incidenti tutti l’anni)… ùn màncanu e paure da avè ! Macron hè cumplettamente irrispunsèvule. •
