Cuntinuemu a nosta rubrica da cuntà i tesori di a nostra lingua à traversu l’Antulugìa di e spressioni corse di Farrandu Ettori. Sse spressioni ci impàranu assai nant’à a nostra stòria è ciò chè no simu. Omu si deve di tramandale.
Sta spressione hè assai impiecata. Si dice in generale quand’omu hà bisognu d’aiutu, li ci volerebbe un ziu prete…
Farrandu Ettori ci impara torna qualcosa : a spressione palisava u statu suciale nanzu à ch’omu fece a spiccanza trà a Ghjesgia è u Statu.
U zìu prete avìa asgiu è struzzione in a sucetà, è si cunsacrava vulinteru à fà a furtuna di i so nipoti, dice Farrandu Ettori, sìa direttamente fendu cresce u so patrimoniu, sìa indirittamente allaziènduli versu a ghjesgia anch’elli, u mistiere d’avucatu, o l’armata.
À u XVIIIu è u XIXu sèculu, assai case di nutàbili sò state cusì custruite da preti. Si sà, dice torna Farrandu Ettori, u rolu ch’ella hà avutu l’arcidiàcunu Lucianu indè a stòria di a famiglia Bonaparte. •
Sarà partutu in Gallura
Hè una spressione di u Pumonte chì s’impieca irunicamente quand’omu si n’hè andatu senza prevene, spieca Farrandu Ettori.
Hè un allusione à i banditi corsi durante sèculi è sèculi, chì si piattàvanu in Gallura, sta parte di u Nordu di a Sardegna chì fatt’è fina anu cusì pupulatu. •
