Ùn a cunniscìa micca, nè ella, nè i soi. Aghju scupertu a so vita, o piuttostu a so trista fine lighjendu u ghjurnale. Puru, cumu ùn sèntesi vicini à ella, cumu ùn esse cummossi di pettu à tamanta inghjustizia di a so sorte ingrada ?
300 personi anu sfilatu in Bastia sta dumènica per ùn lasciala parte cusì. Una «marchja bianca » per sparte un pocu di a so suffrenza di l’ùltime stonde d’una vita di miseria. Ùn avìa chè 30 anni Jennifer Grante, è si lascia duie urfanelle di a so mamma.
A so famiglia, i s’amichi, è uni pochi d’anònimi anu vulsutu rèndeli un umagiu spùticu, accumpagnala un pocu cù a pensata è l’emuzione di pettu à a viulenza chì li hà pigliatu a vita. Jenny hè stata strangulata da u so cumpagnu, eppò lampata ind’è a machja cum’un lozzu, perch’è vulìa andàssine, sorte di l’affocu chì l’upprimava. «Mai più què, Jenny ind’è i nostri cori per l’eternità » dicìa a banderole di linzolu biancu ch’accumpagnava a marchja silenziosa da a Piazza San Niculà à u Palazzu di Ghjustizia. Una marchja à l’arringuesciu di e manifestazioni abituale cum’è per significà u contrasensu di vita di sse donne marturiate da u so cumpagnu.
In Francia sò 216.000 à soffre ogni annu da i colpi di u maritu o u cumpagnu. È solu 16% pòrtanu lagnanza… A voce tremulente da u dulore di a so pèrdita, e so duie cucine, Amandine è Alison, anu dettu qualchi parulla:
« Simu quì aduniti per rende l’ùltimu umagiu à Jenny, parente, amica, una mamma simpliciamente. Jenny era una mamma furmidèvule chì amava e so figliole cum’è tutte e mamme. Amava i s’amichi, a so famiglia, è rispirava a gioia di campà, è malgratu e circustanze, averà torna riesciutu à adunìsceci oghje. A mo cucina, hai sceltu di piglià un antra strada ind’è a to vita, ma ellu hà fattu altrimente. Ci hà lasciatu 14 ghjorni ind’è a speranza. 14 ghjorni ind’i turmenti. 14 ghjorni ind’è a notte è u bughju. Tenite in core tutti sti mumenti di gioia è di beatitùtine chè vo avete spartutu cù ella. Tenìteli quand’è vo pensarete à ella. Spergu chè vi darà un surisu chì più chè tuttu à ella li piacìa à ride. Aghju una pensata particulare per Savannah, partuta anch’ella da a listessa sorte, è per tutte ste donne chì pàtenu viulenze da i so cumpagni […] A mo cucina d’amore ellu t’hà presu a to vita ! Nove ghjorni sò scorsi dapoi ch’elli ti anu ritruvata. Ricevu centinaie di messagi chì mi strùghjenu l’uni più chè l’altri. Perch’è tù ? Tù chì amava cusì tantu a vita. À tè chì piacìa à sorte, amusati è gode di a vita […] A mo cucina d’amore sì ind’u mo core, ind’è u core di a to famiglia, di i t’amichi è di numarosi anònimi. Ti fieghju ogni sera à traversu e stelle. Tù è l’altre donne marturiate. Jenny ti tenimu caru ».
Riposi in pace cara Jenny.
Fabiana Giovannini.
