L’Orca Kasatka si ne more putrefatta viva, bocca è canteghja merzìschenu, dinù altre parte di u so corpu infracicatu, cum’è e so nutaghjole…
Kasatka hè un orca di u bacinu di SeaWorld in Amèrica. S’hè chjappa un infezzione fùngica è ùn ghjùnghjenu à curalla i so maestri. L’orca ùn hà più resistenza immunitaria tratechja ch’ella hè d’antibiòtichi da tutte e mamme dapoi ch’ella hè chjuca chjuca. Ssa malatìa traduce in fatti a so vita di miseria.
A conta l’anziana maestra di SeaWorl Samantha Berg : « a vita di Kasatka, micca a so morte, hè una vera tragedia. » A corciarella hè stata arrubata à i soi in u 1978 à u largu di l’Islanda, ùn avia ch’un annu. Face 39 anni ch’ella hè chjosa in un bacinu à girà in tòndulu per fà smaravigliassi a ghjente chì pàcanu per vèdela soffre, pensendu ch’ella s’amusa…
«U so crìmine ? dice torna Samantha Berg, hè nata orca ! Un animale cusì intelligente, bellu è curiosu per l’umani chì SeaWorld sà ch’ellu pò fà soldi cù ella. »
Per falli fà l’esèrciti, l’omi ùn danu micca à manghjà à i cetacei, i fàcenu fà i chjuchi, per cacciali sùbitu à e so mamme è mandali versu d’altri bacini, sinònimi di priggiò tutta a so corcia vita anch’elli. Kasatka hà cusi avutu quattru figlioli, ogni volta hè statu un crepacore à spiccali. A mamma cum’è u figliolu addisperèndusi. A lea trà a mamma orca è u so chjucu hè forte, dice Samantha Berg « hè un crìmine ancu più forte chì quellu d’impedìsceli di manghjà, caccià un chjucu à a so mamma hè una viulenza emuziunale strema. » A vita di l’orchi hè un martoriu. L’animali ùn sò micca gattivi in a natura, ma divèntanu periculosi impriggiunati. Suvente si vòltanu contr’à i so maestri. Ci sò stati parechji morti in i delfinariomi, è decine di feriti. Ma parechji incidenti sò piatti. I maestri dèvenu zifrà cuntratti di cunfidenzialità. Ùn anu drittu nè di parlà, nè di lagnassi… Parechji, stumacati, anu preferitu perde u so travagliu è testimugnà di u dulore di l’animali è di e cundizioni gattive di vita ch’elli anu. « Stressati, addisperati, drogati, trasfurmati in robbò, alluntanati da i s’amichi o i so figlioli, l’orche isulate divèntanu gattive, pèrdenu u capu. » Certi si tòmbanu da per elli, lampèndusi contr’à i bordi di u bacinu. Ssi cumpurtamenti sò cumpurtamenti di rivolta di schjavi senza sperenza. « S’hà da more Kasatka, omancu a so suffrenza si cumpierà cù ella. U mo core pienghje, micca perch’ella hà da more, ma perch’è meritava di campà megliu » dice torna Samantha Berg… È ssa strage cuntinueghja, in i delfinariomi cum’è in altrò.
Cusì l’orsu biancu di China chjosu in una casa di vetru. È ancu ind’è noi, in u pròssimu centru cumerciale di Baleone in Aiacciu, vòlenu mette un aquariomu cù squali per mustrà à a ghjente cum’ella hè bella a biodiversità di a pianetta !…. Andate à vede i filmi di Cousteau, ma lacate ind’a natura ss’animali ch’ùn dumàndanu chè di campà a so vita lìberi.
Fabiana Giovannini.
